ചിന്ദ് വാര: യുദ്ധത്തിന്റെ പശ്ചാത്തലത്തിൽ രാജ്യത്തുടനീളം പാചക വാതകത്തിന്റെ (എൽപിജി) ക്ഷാമമില്ലെന്നും ഈ വിഷയം അതിശയോക്തിപരമായി പറയുകയാണെന്നും മുതിർന്ന കോൺഗ്രസ് നേതാവ് കമൽ നാഥ് പറഞ്ഞു. മധ്യപ്രദേശിലെ ചിന്ദ് വാരയിൽ മാധ്യമപ്രവർത്തകരോട് സംസാരിക്കുകയായിരുന്നു കമൽനാഥ്.
‘അത്തരമൊരു ക്ഷാമവുമില്ല. ക്ഷാമമുണ്ടെന്ന് ഒരു അന്തരീക്ഷം സൃഷ്ടിക്കപ്പെട്ടിട്ടുണ്ട്,’ മധ്യപ്രദേശ് മുൻ മുഖ്യമന്ത്രി കൂടിയായ കമൽ നാഥ്, ഒരു ചോദ്യത്തിന് മറുപടിയായി മാധ്യമപ്രവർത്തകരോട് പറഞ്ഞു.
ഈ അഭിപ്രായം മറ്റുകോൺഗ്രസ് നേതാക്കൾ പറഞ്ഞതിൽനിന്ന് വ്യത്യസ്തമാണ്.
ഫെബ്രുവരി 28 മുതൽ സംഘർഷം നടക്കുന്ന മിഡിൽ ഈസ്റ്റിലെ സാഹചര്യം ഭാരതം കൈകാര്യം ചെയ്യുന്നതിനെ കോൺഗ്രസും രാഹുൽ ഗാന്ധി ഉൾപ്പെടെയുള്ള നേതാക്കളും വിമർശിക്കുന്നു. ഇവിടെ എൽപിജി ക്ഷാമമുണ്ടെന്ന് കോൺഗ്രസ് പാർട്ടിയും ആരോപിച്ചിരുന്നു, പക്ഷേ സർക്കാർ അത് പൂർണ്ണമായും നിരാകരിച്ചിരുന്നു. ഈ സാഹചര്യത്തിൽ കമൽനാഥിന്റെ നിലപാട് ഏറെ ശ്രദ്ധേയമാകുകയാണ്.
