പ്രധാനമന്ത്രി നരേന്ദ്ര മോദി വീണ്ടും ലോകത്തിലെ ഏറ്റവും ജനപ്രിയനായ നേതാവായി റാങ്ക് ചെയ്യപ്പെട്ടിരിക്കുകയാണ്. യുഎസ് ആസ്ഥാനമായ ഡാറ്റ അനലിറ്റിക്സ് സ്ഥാപനമായ മോര്ണിങ് കണ്സള്ട്ട് നടത്തിയ ഏറ്റവും പുതിയ ആഗോള സര്വേയിലാണ് ഈ അംഗീകാരം. മറ്റ് ആഗോള നേതാക്കളെക്കാള് പ്രധാനമന്ത്രി മോദി വലിയ മുന്നേറ്റം നിലനിര്ത്തുന്നു. സ്വിറ്റ്സര്ലന്ഡിന്റെ പ്രസിഡന്റ് ഗൈ പര്മലിന്, ദക്ഷിണ കൊറിയയുടെ പ്രസിഡന്റ് ലീ ജെ മ്യുങ് എന്നിവരാണ് യഥാക്രമം രണ്ടും മൂന്നും സ്ഥാനത്ത്. ചെക്ക് റിപ്പബ്ലിക്കിന്റെയും അര്ജന്റീനയുടെയും നേതാക്കളാണ് തുടര്ന്നു വരുന്നത്. ആദ്യ പത്ത് പേരില് യുഎസ് പ്രസിഡന്റ് ഡൊണാള്ഡ് ട്രംപ് ഇടം നേടിയിട്ടില്ല. ഇതിനെക്കാള് മുകളിലാണ്
ബ്രിട്ടീഷ് പ്രധാനമന്ത്രി കെയര് സ്റ്റാര്മറുടെയും ഫ്രഞ്ച് പ്രസിഡന്റ് ഇമ്മാനുവല് മക്രോണിന്റെയും സ്ഥാനമെന്നത് കൗതുകകരമാണ്. നിരവധി രാജ്യങ്ങളിലെ പ്രായപൂര്ത്തിയായവരുടെ അഭിപ്രായങ്ങളെ അടിസ്ഥാനമാക്കി ഏഴ് ദിവസത്തെ ശരാശരിയെടുത്താണ് അംഗീകാരം നിര്ണയിച്ചിരിക്കുന്നത്.
പ്രധാനമന്ത്രി മോദി അടുത്തിടെ പൊതുജീവിതത്തില് ഒരു സുപ്രധാന നേട്ടവും കൈവരിച്ചിരുന്നു. ഗുജറാത്ത് മുഖ്യമന്ത്രിയായിരുന്ന കാലവും പ്രധാനമന്ത്രിയായിരുന്ന കാലവും ചേര്ത്ത്, ഭാരതത്തില് ഏറ്റവും ദീര്ഘകാലം ഭരണാധികാരിയായി സേവനം അനുഷ്ഠിച്ചയാളായി മോദി മാറിയിരിക്കുകയാണ്.
8,931 ദിവസം ഭരണാധികാരിയായിരുന്ന വ്യക്തി എന്ന അപൂര്വ്വ നേട്ടമാണ് മോദി കൈവരിച്ചത്. ഇത്രയേറെ കാലം തെരഞ്ഞെടുക്കപ്പെട്ട ഭരണാധികാരിയായിരിക്കുകയെന്നത് ചരിത്രപരമായ ഒരു നേട്ടമാണ്. ഒപ്പം ജനാധിപത്യത്തിന്റെ കരുത്തും അത് വിളിച്ചോതുന്നു.
സിക്കിം മുഖ്യമന്ത്രിയായിരുന്ന പവന് കുമാര് ചാംലിങ്ങിന്റെ റെക്കോര്ഡാണ് മോദി മറികടന്നത്. ഇരുപത്തിയഞ്ച് വര്ഷം ഭരണാധികാരിയായി തുടരുകയെന്നത് ചെറിയ കാര്യമല്ല. തുടര്ച്ചയായ പൊതുസേവനത്തിന്റെയും, ഉയര്ന്ന തലത്തിലുള്ള രാഷ്ട്രീയ നേതൃത്വത്തിന്റെയും പ്രതിഫലനമാണിത്. അധികാരമോഹികളായ നേതാക്കളില് അസൂയ ജനിപ്പിക്കുന്നതാണ് മോദിയുടെ ഈ ട്രാക് റെക്കോര്ഡ്.
രാഷ്ട്രീയ ജീവിതത്തില് നരേന്ദ്ര മോദി നിരവധി ശ്രദ്ധേയ റെക്കോര്ഡുകള് സ്ഥാപിച്ചിട്ടുണ്ട്. ഗുജറാത്തില് ഏറ്റവും ദൈര്ഘ്യമേറിയ കാലം സേവനം ചെയ്ത മുഖ്യമന്ത്രിയാണ് മോദി.സ്വാതന്ത്ര്യാനന്തര ഭാരതത്തില് ജനിച്ച ആദ്യ പ്രധാനമന്ത്രിയെന്ന നിലയിലും മോദി ശ്രദ്ധേയനാണ്. മൂന്നു ലോക്സഭാ തെരഞ്ഞെടുപ്പുകളില് തുടര്ച്ചയായി വിജയിച്ചത് മോദി എന്ന ജനനായകന്റെയും ഭരണാധികാരിയുടെയും ഉറച്ച ജനപിന്തുണയ്ക്ക് തെളിവാണ്. ലോക്സഭയില് പൂര്ണ്ണ ഭൂരിപക്ഷം നേടുന്ന ആദ്യ കോണ്ഗ്രസിതര പ്രധാനമന്ത്രിയായതും, രണ്ട് തവണ കാലാവധി പൂര്ത്തിയാക്കി മൂന്നാം തവണയും അധികാരത്തിലെത്തിയ ആദ്യ കോണ്ഗ്രസിതര പ്രധാനമന്ത്രിയായതും ദേശീയ രാഷ്ട്രീയത്തിലെ നാഴികക്കല്ലാണ്. സമൂഹമാധ്യമങ്ങളില് ഏറ്റവും കൂടുതല് പേര് പിന്തുടരുന്ന നേതാവും ഭരണാധികാരിയും മോദിയാണ്.
നിരവധി ശാക്തിക ചേരികള് നിലനില്ക്കുന്ന ലോകത്ത് സ്വന്തം രാജ്യത്തിന്റെ താല്പ്പര്യം സംരക്ഷിക്കുന്നതില് വിട്ടുവീഴ്ച ചെയ്യാതെ ലോകത്തിന്റെ നേതാവായി ഉയരുകയെന്നത് ഏറെ ശ്രമകരമായ കാര്യമാണ്. നിരവധി സന്ദര്ഭങ്ങളില് ഭാരതത്തിന്റെ താല്പ്പര്യങ്ങള് ബലികഴിച്ച് വിശ്വപൗരനാവാന് ശ്രമിച്ചുവെന്നത് പ്രഥമ പ്രധാനമന്ത്രി ജവഹര് ലാല് നെഹ്റുവിനെതിരായ ശക്തമായ വിമര്ശനമാണ്. യുഎന് രക്ഷാസമിതിയില് അംഗത്വം ലഭിക്കാത്തത് ഉള്പ്പെടെ നിരവധി നഷ്ടങ്ങള് ഭാരതത്തിന് നെഹ്റുവിന്റെ നയം മൂലം സംഭവിച്ചു. ഈ സ്ഥാനത്താണ് പുത്തന് ലോകക്രമത്തില് ഭാരതത്തിന്റെ ശബ്ദം കേള്പ്പിക്കാനും അംഗീകാരം നേടിയെടുക്കാനും പ്രധാനമന്ത്രി മോദിക്ക് കഴിഞ്ഞിട്ടുള്ളത്. ഈ ജൈത്രയാത്ര തുടരുകതന്നെ ചെയ്യുമെന്നതിന്റെ തെളിവാണ് മോദിയെ തേടിയെത്തുന്ന ആഗോള അംഗീകാരങ്ങള്.
