തീക്കോയി: പൂഞ്ഞാര് നിയോജകമണ്ഡലം എന്ഡിഎ സ്ഥാനാര്ഥി പി.സി. ജോര്ജിന്റെ വാഹന പര്യടനം ആരംഭിച്ചു. തീക്കോയി, വാഗമണ്-വഴിക്കടവില് ബിജെപിമേഖലാ പ്രസിഡന്റ് എന്. ഹരി പര്യടനം ഉദ്ഘാടനം ചെയ്തു. നിലപാടില് വെള്ളം ചേര്ക്കാതെ സാധാരണക്കാരന്റെ പ്രശ്നങ്ങളില് ഇടപെടുന്ന ജനകീയ നേതാവാണ് പി.സി. ജോര്ജ് എന്ന് എന് ഹരി പറഞ്ഞു.
തുടര്ന്ന് നിരവധി സ്വീകരണ സ്ഥലങ്ങളില് പ്രവര്ത്തകരും, പൊതുജനങ്ങളും ആവേശോജ്ജ്വലമായ സ്വീകരണങ്ങളൊരുക്കി, പ്രചരണ മേല്നോട്ടങ്ങള്ക്ക് ചുക്കാന് പിടിക്കാന് മഹാരാഷ്ട്രയില് നിന്നും മുന് മന്ത്രിയും ബിജെപി നേതാവുമായ ഡോ. പരിണയ് ഫുകെ,ബിജെപി നാഗ്പൂര് ജില്ലാ പ്രസിഡന്റ് പ്രശാന്ത് വാസങ്കര് എന്നിവരുടെ സാന്നിധ്യം ശ്രദ്ധേയമായി. വഴിക്കടവില് നിന്നാരംഭിച്ച എന്ഡിഎ സ്ഥാനാര്ഥി പി.സി. ജോര്ജിന്റെ തെരഞ്ഞെടുപ്പ് പര്യടനം മലയോര മേഖലയെ ആവേശത്തിലാക്കി.
കഴിഞ്ഞ അഞ്ചുവര്ഷം മണ്ഡലം നേരിട്ട വികസന മുരടിപ്പിന്റെ പരിഹാരത്തിന് പി.സി. ജോര്ജിന്റെ വിജയം അനിവാര്യമാണെന്ന് നാട്ടുകാര് നല്കിയ സ്വീകരണം തെളിയിച്ചു. രാവിലെ 9ന് ആരംഭിച്ച പര്യടനം തീക്കോയി പഞ്ചായത്ത്, ഈരാറ്റുപേട്ട മുനിസിപ്പാലിറ്റി എന്നിവിടങ്ങളില് പൂര്ത്തിയാക്കി അരുവിത്തുറയില് സമാപിച്ചു. പര്യടനം കടന്നുപോയ വഴിയില് പി.സി. ജോര്ജിനെ കാത്ത് കുട്ടികളടക്കം പുഷ്പങ്ങളും, മാലകളും,ഷോളുകളുമായി സ്വീകരണമൊരുക്കി.
മണ്ഡലം പ്രസിഡന്റ് ജോജിയോ ജോസഫ്, സജി കുരീക്കാട്ട്, ലാലി പി വി, ക്ലിന്റ് അരീപ്ലാക്കല്, അപ്പച്ചന് പുല്ലാട്ട്, വിമല് വഴിക്കടവ്, സജീവ് മാപ്രയില്, ബി.ആര്. മഞ്ജീഷ്, കെ.വി. നാരായണന്, ശ്രീകാന്ത് എം.എസ്, ചെയ്സ് ഞള്ളമ്പുഴ, ഇ.ഡി. രമണന്, ജോസ് ഫ്രാന്സിസ്, അജിത മോഹന്ദാസ്, തുടങ്ങിയ നേതാക്കള് നേതൃത്വം നല്കി.
