തിരുവനന്തപുരം: ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് അടക്കമുള്ള പ്രമുഖര് ഇന്ന് വിവിധ കേന്ദ്രങ്ങളില് വരണാധികാരി മുമ്പാകെ നാമനിര്ദ്ദേശ പത്രിക സമര്പ്പിച്ചു. രാജസ്ഥാന് മുഖ്യമന്ത്രി ഭജന്ലാല് ശര്മ്മയുടെയും ബിജെപിയുടെ മുതിര്ന്ന ദേശീയ-സംസ്ഥാന നേതാക്കളുടേയും സാന്നിധ്യത്തിലാണ് പാര്ട്ടി അധ്യക്ഷന് പത്രിക സമര്പ്പിച്ചത്.
കഴക്കൂട്ടം, കാട്ടാക്കട, വട്ടിയൂര്ക്കാവ് സ്ഥാനാര്ത്ഥികളുടെ പത്രികാ സമര്പ്പണ ചടങ്ങിലും രാജസ്ഥാന് മുഖ്യമന്ത്രി പങ്കെടുത്തു. നേമം നിയോജക മണ്ഡലത്തില് നിന്നും മത്സരിക്കുന്ന ബിജെപി സംസ്ഥാന അധ്യക്ഷന് ഇന്ന് രാവിലെ 11.30ന് വികാസ് ഭവനിലെ ലേബര് ഓഫീസിലെത്തി വരണാധികാരി മുമ്പാകെ നാമനിര്ദ്ദേശ പത്രിക സമര്പ്പിച്ചു. കോര്പ്പറേഷന് ഓഫീസ് പരിസരത്തുനിന്നും ആയിരക്കണക്കിന് പ്രവര്ത്തകരുടെ അകമ്പടിയോടെയാണ് പാര്ട്ടി അധ്യക്ഷന് പത്രികാ സമര്പ്പണത്തിനെത്തിയത്.
കാട്ടാക്കട നിയോജക മണ്ഡലത്തിലെ എന്ഡിഎ സ്ഥാനാര്ത്ഥി പി. കെ കൃഷ്ണദാസ് ശനിയാഴ്ച രാവിലെ 11 മണിക്ക് വെള്ളയമ്പലം ജില്ലാ വ്യവസായ കേന്ദ്രം മേധാവി മുമ്പാകെയാണ് പത്രിക സമര്പ്പിച്ചത്. കഴക്കൂട്ടത്തെ ബിജെപി സ്ഥാനാര്ത്ഥി വി മുരളീധരന് ഇന്ന് രാവിലെ 11 മണിക്ക് കളക്ട്രേറ്റിലെത്തി പത്രിക സമര്പ്പിച്ചു. രാവിലെ എട്ടുമണിക്ക് കണ്ണമൂലയിലെ ചട്ടമ്പി സ്വാമി സമാധിയില് പ്രാര്ത്ഥിച്ച് ചെമ്പഴന്തി ഗുരുകുലത്തില് സന്ദര്ശനം നടത്തിയ ശേഷം പ്രവര്ത്തകര്ക്കൊപ്പം കളക്ട്രേറ്റിലേക്കെത്തുകയായിരുന്നു.
വട്ടിയൂര്ക്കാവില് ബിജെപി സംസ്ഥാന വൈസ് പ്രസിഡന്റും കോര്പ്പറേഷന് കൗണ്സിലറും മുന് ഡിജിപിയുമായ ആര് ശ്രീലേഖ ശനിയാഴ്ച 12 മണിക്ക് മ്യൂസിയത്തിന് സമീപം പബ്ലിക് ഓഫീസിലെത്തി നാമനിര്ദ്ദേശ പത്രിക സമര്പ്പിച്ചു.
