തൃശൂര് : വൈദ്യസഹായമില്ലാതെ പ്രസവിച്ച യുവതി മരിച്ച സംഭവത്തില് നവജാത ശിശുവിന്റെ മൃതദേഹം പുറത്തെടുത്ത് പരിശോധിക്കാന് ശുപാര്ശ.മരിച്ച മുഹ്സിനയുടെ ഗര്ഭപാത്രം മുതല് എല്ലാ ഭാഗങ്ങളിലും അണുബാധയുണ്ടെന്നാണ് പോസ്റ്റ്മോര്ട്ടം റിപ്പോര്ട്ട്. അശാസ്ത്രീയമായി അക്യുപങ്ചര് ചികിത്സ നല്കിയ യുവതിയെ കുറിച്ചും പൊലീസ് അന്വേഷണം നടക്കുന്നുണ്ട്.
ജനുവരിയിലാണ് മുഹ്സിന പ്രസവിച്ചത്. പ്രസവം കഴിഞ്ഞ് ആറ് ദിവസം കഴിഞ്ഞ് കുഞ്ഞ് മരിച്ചു. കുഞ്ഞിന്റെ പോസ്റ്റ്മോര്ട്ടം അടക്കം നടപടിക്രമങ്ങള് നടത്തിയിരുന്നില്ല.പ്രസവശേഷം പരിചരണമില്ലായ്മയാണ് യുവതിയുടെ മരണത്തിന് കാരണം.മുഹ്സിനയുടെ
മുതുകിലെ വ്രണം പുഴുവരിച്ച നിലയില് ആയിരുന്നുവെന്നാണ് കണ്ടെത്തല്. ശരീരത്തില് ആകമാനം വ്രണത്തിന് സമാനമായ പാടുകള് ഉണ്ട്. അക്യുപങ്ചര് ചികിത്സയുടെ ഭാഗമായാണ് ഇതെന്നാണ് നിഗമനം.മുഹസിനയുടെ ഭര്ത്താവ് ഇബ്രാഹീം പൊലീസ് നിരീക്ഷണത്തിലാണ്.
ഏഴാമത്തെ പ്രസവത്തിന് പിന്നാലെയാണ് ചാവക്കാട് സ്വദേശിനി മുഹ്സിന മരിച്ചത്. ഇവരുടെ ആരോഗ്യനില മോശമായിട്ടും ഭര്ത്താവ് ആശുപത്രിയില് പ്രവേശിപ്പിച്ചില്ലെന്നാണ് പരാതി.രണ്ടു ദിവസം മുമ്പ് വീട്ടിലെത്തിയ മുഹ്സിനയുടെ മാതാപിതാക്കള് ആണ് അവശനിലയില് ആയ മകളെ ആശുപത്രിയില് എത്തിച്ചത്.
