കൊച്ചി: നെടുമ്പാശേരി വിമാനത്താവളത്തിന് സമീപം വന്ദേഭാരത് എക്സ്പ്രസ് ട്രെയിനിന് നേരെ കല്ലെറിഞ്ഞ സംഭവത്തില് 18 കാരന് അറസ്റ്റില്. പ്രണയബന്ധം തകര്ന്ന നിരാശയിലാണ് ട്രെയിനിന് കല്ലെറിഞ്ഞതെന്നാണ് പ്രതി മൊഴി നല്കിയത്. രണ്ടാഴ്ച നീണ്ട അന്വേഷണത്തിലാണ് ആലുവ അകപ്പറമ്പ് ഭാഗത്ത് നിന്ന് പ്രതിയെ ആര്പിഎഫ് കസ്റ്റഡിയില് എടുത്തത്.
മാര്ച്ച് ഏഴിന് രാത്രി 7.10 ഓടെയാണ് ആലുവയ്ക്കും അങ്കമാലിക്കുമിടെ തിരുവനന്തപുരം-മംഗലാപുരം വന്ദേഭാരത് കടന്നു പോകുമ്പോള് കല്ലേറുണ്ടായത്. സി 9 കോച്ചിന്റെ ജനാലയുടെ ലാമിനേറ്റഡ് ചില്ലിന് നേരിയ പോറലുണ്ടായി.
പ്രണയം തകര്ന്ന ദുഖത്തില് ട്രാക്കിന് സമീപം ഇരിക്കവെ ആണ് ട്രെയിന് വരുന്നത് കണ്ടത്. മൂന്ന് തവണ കല്ലെറിഞ്ഞതില് ഒരെണ്ണമാണ് കൊണ്ടത്. ട്രെയിനിന്റെ കോച്ചിന് പുറത്തുള്ള കാമറയില് നിന്ന് ദൃശ്യങ്ങള് കിട്ടിയെങ്കിലും കല്ലെറിയുന്ന ആളെ വ്യക്തമായിരുന്നില്ല.
സ്ഥിരമായി ട്രാക്കിന് സമീപം വരാറുള്ളവരുടെ പട്ടിക തയാറാക്കി നടത്തിയ അന്വേഷണത്തിലാണ് 18കാരന് പിടിയിലായത്.
