അബുദാബി : അബുദബിയിലെ ബനിയാസ് മേഖലയില് മിസൈല് അവശിഷ്ടങ്ങള് വീണ് പാക്കിസ്ഥാന് സ്വദേശി കൊല്ലപ്പെട്ടു. യു എ ഇ വ്യോമ പ്രതിരോധ സംവിധാനം മിസൈല് തകര്ക്കുന്നതിനിടെ ചിതറിത്തെറിച്ച ഭാഗങ്ങള് താഴേക്ക് പതിച്ചാണ് അപകടമുണ്ടായത്. ചൊവ്വാഴ്ച പുലര്ച്ചെയായിരുന്നു സംഭവം.
പ്രതിരോധ സേന മിസൈല് വിജയകരമായി തടഞ്ഞുവെങ്കിലും അതിന്റെ അവശിഷ്ടങ്ങള് പതിച്ച് ഒരു മരണം സംഭവിക്കുകയായിരുന്നുവെന്ന് ഔദ്യോഗിക പ്രസ്താവനയില് അറിയിച്ചു. വിവരമറിഞ്ഞ ഉടന് തന്നെ എമര്ജന്സി വിഭാഗം സ്ഥലത്തെത്തി സുരക്ഷാ നടപടികള് സ്വീകരിച്ചു.
ഇതോടെ ഇറാന് നടത്തുന്ന ആക്രമണങ്ങളില് യു എ ഇയില് മരിച്ചവരുടെ എണ്ണം എട്ടായി. സംഘര്ഷം ആരംഭിച്ചത് മുതല് ഇതുവരെയുള്ള കണക്കുകള് പ്രകാരം 157 പേര്ക്ക് പരുക്കേറ്റിട്ടുണ്ട്.
