ചെങ്ങന്നൂര്: കോണ്ഗ്രസിലെ ചില നേതാക്കള് മന്ത്രി സജിചെറിയാനുമായി തുടരുന്ന രഹസ്യ ധാരണയ്ക്കെതിരെ കോണ്ഗ്രസില് പടയൊരുക്കം. ശക്തമായ അടിത്തറ ഉണ്ടായിരുന്ന മണ്ഡലത്തില് കഴിഞ്ഞ ഒരു പതിറ്റാണ്ടായി കോണ്ഗ്രസിനെ സജി ചെറിയാനു മുന്പില് ചില നേതാക്കള് അടിയറവ് വച്ചിരിക്കുകയാണെന്നാണ് ആക്ഷേപം. ചെങ്ങന്നൂരിലെ സിപിഎമ്മിലെയും കോണ്ഗ്രസിലെയും അവസാനവാക്കായി സജി ചെറിയാന് മാറിയിട്ട് കാലമേറെയായി.
എന്ഡിഎയ്ക്ക് ശക്തമായ സ്വാധീനമുള്ള ചെങ്ങന്നൂര് മണ്ഡലത്തില് ത്രികോണ മത്സരം വന്നാല് എന്ഡിഎയ്ക്ക് അനുകൂലമായി ചിത്രം മാറും. ഇതു മനസിലാക്കി സജിചെറിയാനെ സഹായിക്കാന് ചില കോണ്ഗ്രസ് നേതാക്കള് ധാരണയിലെത്തിയതായും ഇതിനായി ചില മത, സാമുദായിക നേതാക്കള് ഇടനില നിന്നതായുമാണ് വിവരം.
കോണ്ഗ്രസിലെ ചില നേതാക്കളുമായി മന്ത്രി സജി ചെറിയാന് അടുത്ത ബന്ധമാണുള്ളത്. സജി ചെറിയാനെതിരെ കഴിഞ്ഞ അഞ്ചുവര്ഷം നിരവധി വിഷയങ്ങള് ഉണ്ടായിട്ടും ചെങ്ങന്നൂര് മണ്ഡലത്തില് കാര്യമായ പ്രതിഷേധ സമരം കോണ്ഗ്രസ് നടത്തിയില്ല. തദ്ദേശ സ്വയംഭരണ തെരഞ്ഞെടുപ്പിനു ശേഷം പഞ്ചായത്തുകളില് നടന്ന സ്ഥിരംസമിതി അധ്യക്ഷ തെരഞ്ഞെടുപ്പില് എന്ഡിഎ പ്രതിനിധികളെ പരാജയപ്പെടുത്താന് സജി ചെറിയാന് മുന്നോട്ടു വച്ച ഫോര്മുല കോണ്ഗ്രസ് അംഗീകരിക്കുകയായിരുന്നു.
ഇപ്പോഴത്തെ നീക്കങ്ങളുടെ തനിയാവര്ത്തനമായിരുന്നു 2016ലും 2018ലെ ഉപതെരഞ്ഞെടുപ്പിലും 2021ലും ചെങ്ങന്നൂരില് ഉണ്ടായത്. കോണ്ഗ്രസ് സഹായത്താലാണ് ഈ മൂന്നു തവണയും സിപിഎം മണ്ഡലത്തില് വിജയിച്ചത്.
2021ല് കോണ്ഗ്രസിലെ മുതിര്ന്ന നേതാവ് എം. മുരളിയായിരുന്നു സ്ഥാനാര്ത്ഥി. അദ്ദേഹത്തിന്റെ അഭ്യര്ത്ഥന നോട്ടീസ് പോലും പല ബൂത്തുകളിലും വീടുകളിലെത്തിക്കാന് കോണ്ഗ്രസുകാര് തയാറായില്ല. പോസ്റ്ററുകള് നേതാക്കളുടെ വീടുകളില് കെട്ടിക്കിടന്നു. തെരഞ്ഞെടുപ്പ് പ്രചാരണത്തിന്റെ ആദ്യഘട്ടം കഴിഞ്ഞപ്പോള് തന്നെ അട്ടിമറി ബോധ്യപ്പെട്ടെങ്കിലും എം. മുരളി നിസഹായനായിരുന്നു. കെപിസിസി നേതൃത്വത്തോടുവരെ എം. മുരളി പരാതിപ്പെട്ടെങ്കിലും കാര്യമായ ഇടപെടല് ഉണ്ടായില്ല. തെരഞ്ഞെടുപ്പില് എം. മുരളിക്ക് ദയനീയ തോല്വി ഏറ്റുവാങ്ങേണ്ടിവന്നു.
സജി ചെറിയാനു മുന്നില് അടിയറവു പറയുന്ന കോണ്ഗ്രസ് നേതാക്കള്ക്കെതിരെ പാര്ട്ടിക്കുള്ളില് വലിയ പ്രതിഷേധമാണ് ഉയരുന്നത്. ശക്തമായ മത്സരം നടത്താനുള്ള ഒരു ശ്രമവും കോണ്ഗ്രസ് നേതാക്കളുടെ ഭാഗത്തുനിന്ന് ഉണ്ടാകുന്നില്ലെന്ന് ഒരു കോണ്ഗ്രസ് മണ്ഡലം ഭാരവാഹി പറഞ്ഞു. ബുത്ത് തലത്തിലുള്ള പ്രവര്ത്തനങ്ങള് ആസൂത്രണം ചെയ്തിട്ടില്ല, വോട്ടെടുപ്പിനു മുന്പു തന്നെ കോണ്ഗ്രസ് നേതാക്കള് പരാജയം സമ്മതിച്ചിരിക്കുകയാണെന്നും സജി ചെറിയാനെ പരാജയപ്പെടുത്തുക എന്നതിനേക്കാള്, ബിജെപി മുന്നേറ്റം തടയണം എന്നതിനാണ് നേതാക്കള് പ്രാധാന്യം നല്കുന്നതെന്നും അദ്ദേഹം പറഞ്ഞു.
കഴിഞ്ഞ ലോക്സഭ, തദ്ദേശ തെരഞ്ഞെടുപ്പുകളില് മണ്ഡലത്തില് ബിജെപി ശക്തമായ മുന്നേറ്റമാണ് നടത്തിയത്. മണ്ഡലത്തിലെ ഒന്പതു പഞ്ചായത്തുകളില് അഞ്ചിലും ബിജെപി യാണ് ഭരിക്കുന്നത്. മറ്റു പഞ്ചായത്തുകളിലും ശക്തമായ സ്വാധീനമാണ് ബിജെപിക്കുള്ളത്. സജിചെറിയാന് ഭയപ്പെടുന്നതും ബിജെപി മുന്നേറ്റമാണ്. അതിനാല് കോണ്ഗ്രസ് സഹായം ഉണ്ടെങ്കില് മാത്രമെ വിജയിക്കാന് സാധിക്കുകയുള്ളുവെന്നാണ് സജി ചെറിയാന് ക്യാമ്പിന്റെ വിലയിരുത്തല്. കോണ്ഗ്രസിലെ ചില നേതാക്കളുമായി മാസങ്ങള്ക്കു മുന്പേ ഇതുസംബന്ധിച്ചുള്ള ചര്ച്ചകള് നടത്തിയിരുന്നു. നഗരസഭ പരിധിയിലെ ഒരു ബ്ലോക്ക് കോണ്ഗ്രസ് ഭാരവാഹിയാണ് സജി ചെറിയാനു വേണ്ടി കോണ്ഗ്രസില് അണിയറ ഒരുക്കുന്നത്.
