കൊല്ലം : കരുനാഗപ്പള്ളിയില് അലുവ അതുലിന്റെ കൊലപാതകത്തില് നേരിട്ട് പങ്കെടുത്ത മൂന്ന് പേരെ പൊലീസ് തിരിച്ചറിഞ്ഞു.കടത്തൂര് ഗുണ്ടാ സംഘത്തില്പ്പെട്ട ഗുണ്ടാ തലവന് വിഷ്ണു (ബ്ളാക്ക് വിഷ്ണു ), ഹുസൈന്, ആഷിക് (ആഷിക് തോമ) എന്നിവരെയാണ് തിരിച്ചറിഞ്ഞത്. ഇവര്ക്കെതിരെ കരുനാഗപ്പള്ളി പൊലീസ് കേസ് രജിസ്റ്റര് ചെയ്തു.
ഇതില് ഹുസൈനെ വര്ഷങ്ങള്ക്ക് മുന്പ് അലുവ അതുല് ആക്രമിച്ചിരുന്നു. അതിലെ വൈരാഗ്യമാണ് ക്രൂര കൊലപാതകത്തിന് കാരണമെന്ന് പൊലീസ് പറയുന്നു. ജിം സന്തോഷ് വധക്കേസിലെ കൂട്ടുപ്രതി കുക്കു എന്ന് വിളിക്കുന്ന മനുവും അലുവ അതുലിനൊപ്പം കാറിലുണ്ടായിരുന്നെങ്കിലും മനുവിന് സാരമായ പരിക്കുകള് ഇല്ല. പ്രതികളുടെ സുഹൃത്ത് അനീറിനെ കൊലപ്പെടുത്താന് ശ്രമിച്ചതിന്റെ വൈരാഗ്യവും കാരണമാണ്.
അലുവ അതുല്, ജിം സന്തോഷ് വധക്കേസിലെ ഒന്നാം പ്രതിയാണ്. ജാമ്യത്തിലിറങ്ങിയ അലുവ അതുല് സ്റ്റേഷനിലെത്തി മടങ്ങി പോകുന്നതിനിടെ പിന്തുടര്ന്നെത്തിയ കാര് അതുല് സഞ്ചരിച്ച കാറിനെ റോഡിന് സമീപത്തെ കുഴിയിലേക്ക് ഇടിച്ചിട്ടു. തുടര്ന്ന് മാരകായുധങ്ങളുമായി ഇറങ്ങിയ സംഘം അതുലിനെ നിരവധി തവണ അതുലിനെ വെട്ടി. അതീവ ഗുരുതരാവസ്ഥയില് ആശുപത്രിയിലെത്തിച്ചെങ്കിലും അതുലിന്റെ ജീവന് രക്ഷിക്കാനായില്ല. സംഘത്തില് അഞ്ച് പേരുണ്ടെന്നാണ് പൊലീസ് പറയുന്നത്. ഇപ്പോള് മൂന്ന് പേര്ക്കെതിരെയാണ് ഏഫ് ഐ ആര് ഇട്ട് കേസ് രജിസ്റ്റര് ചെയ്തിരിക്കുന്നത്.
അതേസമയം, ആലുവ അതുലിനെ കൊലപ്പെടുത്താന് സാധ്യതയെന്ന് ഇന്റലിജന്സ് റിപ്പോര്ട്ട് ഉണ്ടായിരുന്നെങ്കിലും പൊലീസ് ഗൗനിച്ചില്ലെന്ന് ആക്ഷേപമുയര്ന്നിട്ടുണ്ട്.
