പാചകവാതകം ബുക്ക് ചെയ്യാൻ കഴിയാതെയും, ഏജൻസികളുമായി ബന്ധപ്പെടാൻ സാധിക്കാതെയും വലയുകയാണ് സാധാരണക്കാർ. ഇന്ധനക്ഷാമം വരുമെന്ന അഭ്യൂഹങ്ങൾക്കിടയിൽ ഗ്യാസ് സിലിണ്ടർ കിട്ടാതാകുമോ എന്ന ഭയം ജനങ്ങൾക്കിടയിൽ വ്യാപകമായിട്ടുണ്ട്.ഇറാൻ-ഇസ്രയേൽ സംഘർഷങ്ങളുടെ പശ്ചാത്തലത്തിൽ വാണിജ്യ സിലിണ്ടറുകളുടെ വിതരണം തടസ്സപ്പെട്ടതും അടുത്തിടെയുണ്ടായ വില വർദ്ധനവും ജനങ്ങളെ പരിഭ്രാന്തിയിലാക്കിയിരിക്കുകയാണ്
ആശങ്കകള് നിലനില്ക്കുന്ന ഈ സമയത്ത് ആളുകള് സിലിണ്ടറുകൾ അനാവശ്യമായി വാങ്ങി പൂഴ്ത്തിവെക്കുന്നത് തടയാൻ എണ്ണക്കമ്പനികൾ പുതിയൊരു നിബന്ധന കർശനമാക്കിയിട്ടുണ്ട്. ഒരു സിലിണ്ടർ വിതരണം ചെയ്ത് 25 ദിവസം പൂർത്തിയാകാതെ അടുത്ത സിലിണ്ടറിനായുള്ള ബുക്കിങ് സിസ്റ്റം സ്വീകരിക്കില്ല. ഈ നിയമം അറിയാതെയാണ് പലരും നിരന്തരം ഏജൻസികളിലേക്ക് വിളിക്കുന്നത്.
ഗ്യാസ് ഏജന്സികളെ കുഴക്കുന്നത് സാങ്കേതിക തകരാറുകളാണ്. എണ്ണക്കമ്പനികളുമായി ബന്ധിപ്പിച്ചിട്ടുള്ള സോഫ്റ്റ്വയറിലെ നിരന്തരമായ സർവർ തകരാറുകള് മൂലം ഏജന്സികളുടെ പ്രവർത്തനം പലപ്പോഴും സ്തംഭിക്കുകയാണ്. പകൽ സമയങ്ങളിൽ സർവർ പൂർണ്ണമായും പണിമുടക്കുകയോ ഇഴയുകയോ ചെയ്യുന്നതിനാൽ, ബുക്കിങ് ഉൾപ്പെടെയുള്ള ഒരു കാര്യങ്ങളും ചെയ്യാൻ കഴിയാത്ത അവസ്ഥയിലാണ്
ബില്ലടിക്കുന്നതും സ്റ്റോക്ക് അപ്ഡേറ്റ് ചെയ്യുന്നതും, ഓയിൽ കമ്പനികൾക്ക് നൽകേണ്ട റിപ്പോർട്ടുകൾ തയ്യാറാക്കുന്നതുമെല്ലാം ഈ സോഫ്റ്റ്വയർ വഴിയാണ്. ഗ്യാസുമായി വരുന്ന ലോറികളും വിതരണ വാഹനങ്ങളും വഴിയിൽ തടഞ്ഞുനിർത്തി സിലിണ്ടറുകൾ സ്വന്തമാക്കാൻ നാട്ടുകാർ ഓടിവരുന്ന അവസ്ഥയും ഉണ്ട്. വാഹനം തടഞ്ഞുള്ള ഈ സിലിണ്ടർ വാങ്ങൽ പലപ്പോഴും വിതരണക്കാരും നാട്ടുകാരും തമ്മിലുള്ള വാക്കേറ്റങ്ങൾക്കും കാരണമാകുന്നുണ്ട്.
പഴയ സിലിണ്ടർ ലഭിച്ച് 25 ദിവസം കഴിഞ്ഞിട്ടുണ്ടെന്ന് ഉറപ്പുവരുത്തിയ ശേഷം വാട്സ്ആപ്പ് വഴിയോ മറ്റ് ആപ്പുകൾ വഴിയോ എളുപ്പത്തിൽ ബുക്കിങ് നടത്താം. വാട്സ്ആപ്പ് വഴി ബുക്ക് ചെയ്യാൻ റജിസ്റ്റർ ചെയ്ത മൊബൈൽ നമ്പറിൽ നിന്നും ഗ്യാസ് കമ്പനികളുടെ ഔദ്യോഗിക വാട്സ്ആപ്പ് നമ്പറിലേക്ക് മെസ്സേജ് അയക്കാവുന്നതാണ്. ഇതുകൂടാതെ ഔദ്യോഗിക ആപ്പുകൾ വഴിയോ, Google Pay, PhonePe, Paytm എന്നിവയിലെ ‘Book a Cylinder’ ഓപ്ഷൻ വഴിയോ ഗ്യാസ് ബുക്ക് ചെയ്യാവുന്നതാണ്.
