കണ്ണൂര്:മന്ത്രി വീണാ ജോര്ജിനെ വധിക്കാന് ശ്രമിച്ചെന്ന് ആരോപിച്ച് അറസ്റ്റ് ചെയ്യപ്പെട്ട കെഎസ്യു പ്രവര്ത്തകര് ജയില് മോചിതരായി. നടപടി ക്രമങ്ങള് പൂര്ത്തിയാക്കി വൈകുന്നേരം നാല് മണിയോടെ പുറത്തിറങ്ങിയ പ്രവര്ത്തകരെ സ്വീകരിക്കാന് ധാരാളം പാര്ട്ടിക്കാരെത്തി.
വധശ്രമം അടക്കം ഒമ്പത് വകുപ്പുകള് ചുമത്തിയാണ് കരിങ്കൊടി കാട്ടിയവരെ അറസ്റ്റ് ചെയ്തത്. എന്നാല് വധിക്കാന് ശ്രമിച്ചതിന് തെളിവുകള് ഒന്നും കണ്ടെത്താന് പൊലീസിന് സാധിച്ചിരുന്നില്ല. മന്ത്രിക്കെതിരെ പ്രതിഷേധിക്കാന് എത്തിയ കോണ്ഗ്രസ് പ്രവര്ത്തകരുടെ പക്കല് കരിങ്കൊടി മാത്രമേ ഉണ്ടായിരുന്നുളളൂ എന്ന് സംഭവസമയത്ത് ഡ്യൂട്ടിയിലുണ്ടായിരുന്ന പൊലീസുകാരും മൊഴി നല്കിയിരുന്നു.
കെഎസ്യു ജില്ലാ പ്രസിഡന്റ് എം.സി.അതുല്,അക്ഷയ് മാട്ടൂല്, ബിതുല് ബാലന്, സി.എച്ച്.മുബാസ്, അഹമ്മദ് യാസീന് എന്നിവരാണ് ജയില് മോചിതരായത്.എല്ലാ തിങ്കളാഴ്ചയും അന്വേഷണ ഉദ്യോഗസ്ഥരുടെ മുന്നില് ഹാജരാകണം. ജാമ്യ കാലയളവില് മറ്റ് കുറ്റകൃത്യങ്ങളില് ഏര്പ്പെടരുത് എന്നീ വ്യവസ്ഥകളോടെ അമ്പതിനായിരം രൂപയുടെ രണ്ട് ആള് ജാമ്യത്തിലാണ് അഞ്ചുപേരെയും വിട്ടയച്ചത്.
