കൊച്ചി: ശമ്പള വര്ധന ഉള്പ്പെടെ ആവശ്യങ്ങളുയര്ത്തി സംസ്ഥാനത്തെ സ്വകാര്യ ആശുപത്രി നഴ്സുമാര് നടത്തുന്ന സമരം നിര്ത്തി ചര്ച്ചയ്ക്കു തയാറാകാന് നിര്ദേശിച്ച് ഹൈക്കോടതി. ഹൈക്കോടതി മീഡിയേഷന് സെന്ററില്നിന്ന് നിയോഗിക്കുന്ന വ്യക്തിയുടെ മേല്നോട്ടത്തില് നഴ്സുമാരും ആശുപത്രി മാനേജ്മെന്റുകളും തമ്മില് ചര്ച്ചകള് നടക്കും.
ഹൈക്കോടതി മീഡിയേഷന് സെന്ററില് ചൊവ്വാഴ്ച രാവിലെ പത്തോടെയാണ് ചര്ച്ച നിശ്ചയിച്ചിട്ടുളളത്. ചര്ച്ച കഴിഞ്ഞ് വ്യാഴാഴ്ച ഹൈക്കോടതി കേസ് വീണ്ടും പരിഗണിക്കും. ചര്ച്ച പൂര്ത്തിയാകും വരെ സമരം പാടില്ലെന്നാണ് നിര്ദേശം.ഈ പശ്ചാത്തലത്തില് ശനിയാഴ്ച മുതല് നഴ്സുമാര് ജോലിക്കു കയറാന് സാധ്യത തെളിഞ്ഞു.
നഴ്സുമാരുടെ സമരം ചൂണ്ടിക്കാട്ടി കേരള പ്രൈവറ്റ് ഹോസ്പിറ്റല് അസോസിയേഷനാണ് ഹൈക്കോടതിയെ സമീപിച്ചത്. ആശുപത്രികളുടെ ദൈനംദിന പ്രവര്ത്തനങ്ങള് തടസപ്പെടുത്തരുതെന്നും ആശുപത്രികള്ക്ക് ആവശ്യമായ പൊലീസ് സംരക്ഷണം ഉറപ്പാക്കണമെന്നും നേരത്തേ ഹൈക്കോടതി ഇടക്കാല ഉത്തരവിട്ടിരുന്നു.
അതേസമയം, കുറെ ആശുപത്രികള് സമരക്കാരുമായി ധാരണയിലെത്തിയെന്ന് സമരക്കാര് അവകാശപ്പെടുന്നു. ബാക്കിയുള്ള ആശുപത്രികള് കൂടി ധാരണയിലെത്തിയാല് മാത്രമേ സമരം പൂര്ണമായി അവസാനിപ്പിക്കുകയുള്ളൂ എന്ന് നഴ്സുമാര് അറിയിച്ചു.
