തിരുവനന്തപുരം: കെഎസ്ആര്ടിസിയുടെ 1965 മോഡല് വിന്റേജ് ബസ് മന്ത്രി കെ. ബി ഗണേഷ് കുമാര് ഫ്ളാഗ് ഓഫ് ചെയ്തു. കെഎസ്ആര്ടിസിയുടെ ആദ്യ സര്വീസ് ആരംഭിച്ച തിരുവനന്തപുരം കവടിയാര് കൊട്ടാരത്തിന് മുന്നില് നിന്നായിരുന്നു വിന്റേജ് ബസിന്റെ ഫ്ളാഗ് ഓഫ്. ആദ്യ യാത്ര വെള്ളയമ്പലം ജംഗ്ഷന് ചുറ്റി ലോക്ഭവന് സമീപം അവസാനിച്ചു. മന്ത്രിയോടൊപ്പം, കെഎസ്ആര്ടിസി സിഎംഡി പി എസ് പ്രമോജ് ശങ്കര്, ഉദ്യോഗസ്ഥര്, പൊതുജനങ്ങള്, മാധ്യമപ്രവര്ത്തകര് തുടങ്ങിയവര് ആദ്യയാത്രയില് പങ്കെടുത്തു.
തുടക്കത്തില് തിരുവനന്തപുരം നഗരത്തില് വിന്റേജ് ബസ് സര്വീസ് നടത്തുമെന്നും, ലഭിക്കുന്ന പ്രതികരണമനുസരിച്ച് മറ്റിടങ്ങളിലേയ്ക്കും സര്വീസ് തുടങ്ങുമെന്നും മന്ത്രി അറിയിച്ചു. ബഡ്ജറ്റ് ടൂറിസം പദ്ധതിയില് ഉള്പ്പെടുത്തി ഓപ്പണ് ഡബിള് ഡക്കര് ബസ് പോലെ വിനോദ സഞ്ചാരത്തിന് ഉപയോഗിക്കാനും പദ്ധതിയുണ്ട്. കല്യാണ ഫോട്ടോഷൂട്ടുകള്ക്ക് ഉള്പ്പടെ വിന്റേജ് ബസ് ഉപയോഗപ്പെടുത്താനാകുമെന്നും മന്ത്രി പറഞ്ഞു.
കെഎസ്ആര്ടിസി സെന്ട്രല് വര്ക്ക് ഷോപ്പിലായിരുന്നു വിന്റേജ് ബസിന്റെ നിര്മ്മാണം. എന്ജിനിയര് ഉണ്ണികൃഷ്ണന്റെ മേല്നോട്ടത്തില് ജീവനക്കാര് രണ്ട് മാസത്തിലാണ് വിന്റേജ് ബസ് നിര്മ്മിച്ചത്. 2013 മോഡല് അശോക് ലെയ്ലാന്ഡ് ബസാണ് വിന്റേജ് രീതിയില് മാറ്റിയിരിക്കുന്നത്. ബിഎസ് 3 എന്ജിനാണ് ഉപയോഗിച്ചിട്ടുള്ളത്. പഴയ വാഹനത്തിന്റെ ഡിസൈനും, ഗ്രില്ലും, ഹെഡ് ലൈറ്റും, ബസ് ഗ്രീന് നിറവും, ഷട്ടര് വിന്ഡോയും, സീറ്റുകളും, ലൈറ്റുകളും, രണ്ട് ഗ്ലാസ്സുള്ള വിന്ഡ് ഷീല്ഡ് മാതൃകയുമെല്ലാം അതുപോലെ സ്വീകരിച്ചാണ് ബസ് നിര്മിച്ചിരിക്കുന്നത്. 52 പേര്ക്കുള്ള യാത്രാ സൗകര്യമുണ്ട്.
