കണ്ണൂര്: കണ്ണൂര് റെയില്വെ സ്റ്റേഷനില് മന്ത്രി വീണ ജോര്ജിനെതിരെ പ്രതിഷേധിച്ച കെഎസ്യു പ്രവര്ത്തകരുടെ പക്കല് കരിങ്കൊടി മാത്രമേ ഉണ്ടായിരുന്നുളളൂ എന്ന് സ്ഥലത്തുണ്ടായിരുന്ന പൊലീസുകാര്.കണ്ണൂര് റെയില്വെ സ്റ്റേഷനില് നടന്നത് ഉന്തും തള്ളും മാത്രമാണെന്ന് പൊലീസുകാര് അന്വേഷണ സംഘത്തിന് മൊഴി നല്കി.
കണ്ണൂര് ടൗണ് പൊലീസ് സ്റ്റേഷനിലെ മൂന്ന് പൊലീസ് ഉദ്യോഗസ്ഥരുടെ മൊഴിയാണ് അന്വേഷണ സംഘം രേഖപ്പെടുത്തിയത്. അതിനിടെ,ആരോഗ്യമന്ത്രി വീണാ ജോര്ജിനെ വധിക്കാന് ശ്രമിച്ചെന്ന കേസില് കെഎസ്യു പ്രവര്ത്തകര്ക്ക് ജാമ്യം ലഭിച്ചു.തലശേരി ജില്ലാ സെഷന്സ് കോടതിയാണ് കെഎസ്യു കണ്ണൂര് ജില്ലാ പ്രസിഡന്റ് എം സി അതുല് ഉള്പ്പടെ അഞ്ച് പേര്ക്ക് ജാമ്യം അനുവദിച്ചത്.വധശ്രമം ഉള്പ്പടെയുള്ള ഒമ്പത് വകുപ്പുകള് ചുമത്തിയായിരുന്നു കേസ്.
പ്രതികള് ആയുധമുപയോഗിച്ച് വധിക്കാന് ശ്രമിച്ചുവെന്നും ഗൂഢാലോചന നടത്തിയെന്നുമാണ് പ്രോസിക്യൂഷന് വാദിച്ചത്.എന്നാല്,പ്രതികളെ കസ്റ്റഡിയില് വാങ്ങിയിട്ടും തെളിവുകള് കണ്ടെത്താന് കഴിയാത്തതും മന്ത്രിയുടെ മൊഴി രേഖപ്പെടുത്താത്തതും പ്രതിഭാഗം ചൂണ്ടിക്കാട്ടി.
