തിരുവനന്തപുരം: കോന്നി മെഡിക്കല് കോളേജ് ആശുപത്രിയില് മതിയായ ചികിത്സ സൗകര്യങ്ങളില്ലെന്ന് അറിയിച്ച് നോട്ടീസ് പതിച്ച സര്ജറി വിഭാഗം മേധാവി ഡോ. ശിവപ്രസാദിനെതിരെ ആരോഗ്യമന്ത്രി വീണ ജോര്ജ്. ഡോ. ശിവപ്രസാദ് അച്ചടക്ക നടപടി നേരിട്ട ആളാണെന്ന് മന്ത്രി ആരോപിച്ചു.
വീടിനോട് ചേര്ന്ന് ഭാര്യയുടെ പേരിലുള്ള സ്വകാര്യ ആശുപത്രിയില് പ്രാക്ടീസ് നടത്തിയതിന് വിജിലന്സ് ഡോ. ശിവപ്രസാദിനെ പിടികൂടിയിട്ടുണ്ടെന്ന് വീണ ജോര്ജ് പറഞ്ഞു.വിജിലന്സ് റിപ്പോര്ട്ടിനെ തുടര്ന്ന് വകുപ്പുതല അന്വേഷണത്തില് പരാതി ശരിയാണെന്ന് ബോധ്യപ്പെട്ടതാണ്. തുടര്ന്ന് ഡോ. ശിവപ്രസാദിന്റെ ഒരു ഇന്ക്രിമെന്റ് തടഞ്ഞതായും മന്ത്രി വ്യക്തമാക്കി. ഡോക്ടര് ശിവപ്രസാദിന് മറ്റ് താത്പര്യങ്ങള് ഉണ്ടെന്ന് സംശയിക്കേണ്ട സാഹചര്യമാണെന്ന് മന്ത്രി പറഞ്ഞു.
ഓരോ മെഡിക്കല് കോളജിന്റെയും നിലവാരം അനുസരിച്ച് ആണ് ചികിത്സ സൗകര്യമുളളത്. കോന്നിയില് റോബോട്ടിക് സര്ജറി പറ്റില്ലെന്ന് മന്ത്രി പറഞ്ഞു. കോന്നി മെഡിക്കല് കോളേജില് ഓപ്പറേഷന് തിയേറ്റര് ഉള്പ്പെടെ എല്ലാം തുടങ്ങിയത് ഇടത് സര്ക്കാരാണ്.
ശസ്ത്രക്രിയയ്ക്ക് എത്തുന്ന രോഗികള് ആശുപത്രിയുടെ അപര്യാപ്തതകള് അറിഞ്ഞിരിക്കണമെന്നും വേണ്ടത്ര ഉപകരണങ്ങളില്ലാത്തത് ജീവഹാനി വരെ ഉണ്ടാക്കാമെന്നും ഡോ ശിവപ്രസാദ് പതിച്ച നോട്ടീസില് പറയുന്നു. സംഭവം വാര്ത്ത ആയതിന് പിന്നാലെ സൂപ്രണ്ട് ഇടപെട്ട് നോട്ടീസ് നീക്കം ചെയ്തു.
