വഴക്കൊക്കെ സാധാരണം, ഗാര്‍ഹിക പീഡനമോ സ്ത്രീധന പീഡനമോ ആയി കാണേണ്ടതില്ലെന്ന് സുപ്രീം കോടതി

ന്യൂദല്‍ഹി : കേവലം വഴക്കുണ്ടാക്കുന്നത് ഗാര്‍ഹിക പീഡനമോ സ്ത്രീധന പീഡനമോ ആയി കണക്കാക്കാനാവില്ലെന്ന് സുപ്രീം കോടതി .
സ്ത്രീധന പീഡന കേസില്‍ ഒരു സ്ത്രീയുടെ ഭര്‍തൃമാതാപിതാക്കള്‍ക്കെതിരായ ക്രിമിനല്‍ നടപടികള്‍ റദ്ദാക്കിക്കൊണ്ടാണ് കോടതി ഈ നിരീക്ഷണം നടത്തിയത്. സ്ത്രീയുമായി വഴക്കുണ്ടാക്കുമെന്നത് മാത്രമാണ് പ്രതികള്‍ക്കെതിരായ ഏക ആരോപണമെന്ന് കോടതി നിരീക്ഷിച്ചു. ഇന്ത്യന്‍ ശിക്ഷാ നിയമത്തിലെ സെക്ഷന്‍ 498 എ, സ്ത്രീധന നിരോധന നിയമത്തിലെ സെക്ഷന്‍ 3 & 4 എന്നിവ പ്രകാരം വഴക്ക് ഗാര്‍ഹിക പീഡനമോ സ്ത്രീധന പീഡനമോ ആയി കണക്കാക്കില്ലെന്ന് കോടതി പറഞ്ഞു.
ഒരേ എഫ്ഐആര്‍ പ്രകാരമുള്ള കേസില്‍ ഭര്‍തൃസഹോദരിക്കെതിരായ കേസ് ഹൈക്കോടതി റദ്ദാക്കിയിരുന്നു. ഈ സാഹചര്യത്തില്‍ ഭര്‍തൃമാതാപിതാക്കള്‍ക്കെതിരായ കേസും റദ്ദാക്കാവുന്നതേയുള്ളൂവെന്ന് സുപ്രീം കോടതി ചൂണ്ടിക്കാട്ടി. ബിഎംഡബ്ല്യു കാറും മറ്റ് വിലപിടിപ്പുള്ള വസ്തുക്കളും ഉള്‍പ്പെടെയുള്ള ആവശ്യങ്ങളുന്നയിച്ച് ഭര്‍ത്താവും ഭര്‍തൃമാതാപിതാക്കളും സഹോദരിയും തന്നോട് ‘വഴക്കുണ്ടാക്കുമായിരുന്നു’ എന്നാണ് പരാതിക്കാരി ആരോപിച്ചിരുന്നത്.