2025 ലെ എൻടിആർ ദേശീയ ചലച്ചിത്ര അവാർഡ് മെഗാസ്റ്റാർ ചിരഞ്ജീവിക്ക്. പുതുതായി അവതരിപ്പിച്ച ഗദ്ദർ അവാർഡുകളുടെ ഭാഗമായി തെലങ്കാന സർക്കാർ പ്രഖ്യാപിച്ച ബഹുമതിയാണിത്. ഇന്ത്യൻ സിനിമയ്ക്ക് ചിരഞ്ജീവി നൽകിയ മഹത്തായ സംഭാവനകളെ മുൻനിർത്തിയാണ് ഈ പുരസ്കാരത്തിന് അദ്ദേഹത്തെ തിരഞ്ഞെടുത്തത്. തെലുങ്ക് വാണിജ്യ സിനിമയെ തന്റെ മാസ് അപ്പീൽ, നൃത്തം, പ്രതിഭ എന്നിവയിലൂടെ പുനർനിർവചിച്ചതിന് പേരുകേട്ട മെഗാസ്റ്റാർ ചിരഞ്ജീവി, തമുറകളിലൂടെ കടന്നു വരുന്ന പ്രേക്ഷക പ്രീതിയുടെ പാരമ്പര്യമാണ് സൃഷ്ടിച്ചെടുത്തത്.
ഇതിഹാസ നടനും മുൻ ആന്ധ്രാപ്രദേശ് മുഖ്യമന്ത്രിയുമായ എൻടി രാമറാവുവിന്റെ പേരിലാണ് എൻടിആർ ദേശീയ അവാർഡ് അറിയപ്പെടുന്നത്. ദേശീയ, ആഗോള വേദികളിൽ ഇന്ത്യൻ സിനിമയുടെ നിലവാരം ഉയർത്തിയ വ്യക്തികളെ ആദരിക്കുന്നതിന്റെ ഭാഗമായാണ് ഈ പുരസ്കാരം നൽകുന്നത്.
ഈ ഏറ്റവും പുതിയ അംഗീകാരം, ചിരഞ്ജീവിയുടെ കരിയറിലെ ഇതിനോടകം വന്നു ചേർന്നിട്ടുള്ള ശ്രദ്ധേയമായ നേട്ടങ്ങളിൽ വളരെ പ്രധാനപ്പെട്ട ഒന്നാണ്. 2024 ൽ അദ്ദേഹത്തിന് പത്മവിഭൂഷൺ ലഭിച്ചിരുന്നു. കൂടാതെ അഭിനേതാവ് നിലയിൽ അദ്ദേഹത്തിന്റെ അസാധാരണ നേട്ടങ്ങൾക്ക് ഗിന്നസ് വേൾഡ് റെക്കോർഡിൽ നിന്ന് അംഗീകാരവും സ്വന്തമാക്കി.
കരിയറിലെ ആദ്യ കാലഘട്ടത്തിലെ നിലനിൽപ്പിനായുള്ള പോരാട്ടങ്ങൾ മുതൽ, ഇന്ത്യൻ സിനിമാ ചരിത്രത്തിലെ ഏറ്റവും ആഘോഷിക്കപ്പെടുന്ന താരങ്ങളിൽ ഒരാളായി മാറുന്നത് വരെയുള്ള ചിരഞ്ജീവിയുടെ യാത്ര, ഇന്നും എണ്ണമറ്റ അഭിനേതാക്കളെയും ചലച്ചിത്ര പ്രവർത്തകരെയും പ്രചോദിപ്പിച്ചുകൊണ്ടിരിക്കുന്നു.
പ്രൊഫഷണൽ രംഗത്ത്, ചിരഞ്ജീവിയുടെ ഏറ്റവും പുതിയ റിലീസായ മന ശങ്കര വര പ്രസാദ് ഗാരു, തെലുങ്കിലെ വമ്പൻ ഹിറ്റുകളിൽ ഒന്നായി മാറിയിരുന്നു. ഇപ്പോൾ സംവിധായകൻ ബോബിക്കൊപ്പം വരാനിരിക്കുന്ന ചിത്രത്തിനായി തയ്യാറെടുക്കുകയാണ് അദ്ദേഹം. സിനിമാപ്രേമികളും ആരാധകരും അദ്ദേഹത്തിന്റെ പുതിയ വമ്പൻ ചിത്രമായ ഫാന്റസി എന്റർടെയ്നർ വിശ്വംഭരയുടെ റിലീസിനായി ആകാംക്ഷയോടെ കാത്തിരിക്കുകയാണ്
