ശ്രീനഗര്: ഭാരതാതിര്ത്തിയില് പ്രകോപനമുണ്ടാക്കാന് പാകിസ്ഥാന് നീക്കം. പാകിസ്ഥാനും അഫ്ഗാനിസ്ഥാനുമിടയില് നില്ക്കുന്ന സംഘര്ഷാവസ്ഥയുടെ പശ്ചാത്തലത്തില് ഭാരതത്തിനെതിരെ അതിര്ത്തി കടന്നുള്ള ഭീകരാക്രമണത്തിന് സാധ്യതയുണ്ടെന്ന് കേന്ദ്ര രഹസ്യാന്വേഷണ ഏജന്സികള് മുന്നറിയിപ്പ് നല്കി. ഇതേത്തുടര്ന്ന് ഭാരതത്തിലുടനീളം സുരക്ഷ ശക്തമാക്കി. അഫ്ഗാനിസ്ഥാനുമായുള്ള സംഘര്ഷവും ബലൂചിസ്ഥാനിലെ കലാപ പ്രവര്ത്തനങ്ങളും ശക്തമായ സാഹചര്യമാണ് പാകിസ്ഥാന്റെ പടിഞ്ഞാറന് അതിര്ത്തിയില് നിലവിലുള്ളത്. ഇതിനിടയിലാണ് പ്രകോപനം സൃഷ്ടിക്കാന് ഭാരതത്തിലെക്ക് ഭീകരരെ കടത്തിവിടാന് പാകിസ്ഥാനും ഐഎസ്ഐയും ശ്രമിക്കുന്നതെന്ന് രഹസ്യാന്വേഷണ വിഭാഗം പറയുന്നു.
ജമ്മു-കശ്മിരിലെ നിയന്ത്രണരേഖയ്ക്ക് സമീപം നുഴഞ്ഞുകയറ്റശ്രമം സൈന്യം നേരത്തെ തന്നെ തകര്ത്തിരുന്നു. അതേസമയം സുരക്ഷ അവലോകനയോഗങ്ങള് വിവിധ പ്രദേശങ്ങളില് നടന്നു. ജമ്മു-കശ്മിര് ലെഫ്റ്റനന്റ് ഗവര്ണര് മനോജ് സിന്ഹ ശ്രീനഗറില് ഉന്നതതലയോഗം ചേര്ന്ന് സുരക്ഷാ സംവിധാനങ്ങള് വിലയിരുത്തി. നോര്ത്ത് കമാന്റ് മേധാവി ലെഫ്റ്റനന്റ് ജനറല് പ്രതിക് ശര്മയും സുരക്ഷ ഏജന്സികളുമായ് പ്രത്യേക യോഗം നടത്തി. രഹസ്യാന്വേഷണ വിവരങ്ങളുടെ അടിസ്ഥാനത്തില് ഭാരതത്തിന്റെ പടിഞ്ഞാറന് അതിര്ത്തികളില് സുരക്ഷ ശക്തമാക്കാനും പ്രധാന നഗരങ്ങളായ മംബൈ, ദല്ഹി, ജമ്മു-കശ്മിര് എന്നിവിടങ്ങളില് കര്ശന ജാഗ്രത പാലിക്കാനും കേന്ദ്ര ആഭ്യന്തര മന്ത്രാലയം സുരക്ഷാസേനകള്ക്ക് നിര്ദേശം നല്കി.
