ആലപ്പുഴ: റാങ്ക് ലിസ്റ്റ് വന്ന് ഒമ്പത് മാസം കഴിഞ്ഞിട്ടും ജില്ലയിലെ ഒന്നാം റാങ്ക് ജേതാവിന് പോലും നിയമനം ലഭിക്കാത്തതില് പ്രതിഷേധിച്ച് പിഎസ്സി എല് പി സ്കൂള് ടീച്ചര് ഉദ്യോഗാര്ഥികള് ആലപ്പുഴ ഡിഡി ഓഫിസിനു മുന്നില് സമരം നടത്തി. എല്പി റാങ്ക് ലിസ്റ്റില് കപ്പലണ്ടി പൊതിഞ്ഞ് നല്കി ഉദ്യോഗാര്ഥികള് പ്രതിഷേധം രേഖപ്പെടുത്തി.
മെയ് 31ന് ആണ് ലിസ്റ്റ് നിലവില് വന്നത്. ആറു ജില്ലകളില് മാത്രമാണ് ഒന്നാം സ്ഥാനക്കാരന് നിയമനം ലഭിച്ചത്. തസ്തിക നിര്ണയം, പുനര്വിന്യാസം തുടങ്ങിയ സ്ഥിരം പ്രക്രിയകളില് തട്ടിയാണ് എല്പി സ്കൂള് ടീച്ചര് റാങ്ക് ലിസ്റ്റില് ഉള്പ്പെട്ട നൂറ് കണക്കിന് ഉദ്യോഗാര്ഥികളുടെ നിയമന സാധ്യതകള് തകിടംമറിയുന്നത്. മെയിന് ലിസ്റ്റില് 6113, സപ്ലിമെന്ററി ലിസ്റ്റില് 5488, ഭിന്നശേഷി ലിസ്റ്റില് 157 എന്നിങ്ങനെ 11,758 പേരെയാണ് റാങ്ക് ലിസ്റ്റില് ഉള്പ്പെടുത്തിയിരിക്കുന്നത്.
പിഎസ്സി അടുത്ത കാലത്തായി പ്രസിദ്ധീകരിക്കുന്ന റാങ്ക് ലിസ്റ്റുകളില് മുന് ലിസ്റ്റിനെ അപേക്ഷിച്ച് ഉദ്യോഗാര്ഥികളെ കുറയ്ക്കുകയാണ് പതിവെങ്കിലും എല്പി സ്കൂള് ടീച്ചര് റാങ്ക് ലിസ്റ്റില് 150ല് അധികം പേരെ കൂടുതലായി ഉള്പ്പെടുത്തുകയായിരുന്നു. എന്നാല് ലിസ്റ്റ് വര്ധിപ്പിച്ചതിന്റെ ഗുണം നിയമനത്തില് പ്രതിഫലിക്കുന്നില്ല. നിലവില് വന്ന് ഇത്രയും മാസങ്ങള് കഴിഞ്ഞെങ്കിലും ഇതുവരെ രണ്ട് ശതമാനം പേര്ക്കു മാത്രമാണ് നിയമന ശുപാര്ശ ലഭിച്ചത്.
നിയമനം നടക്കാത്തതില് പ്രതിഷേധിച്ച് തിരുവനന്തപുരത്ത് സെക്രട്ടേറിയറ്റിനു മുന്നില് മുട്ടിലിഴഞ്ഞു സമരം നടത്തി ഉദ്യോഗാര്ഥികള് പ്രതിഷേധിച്ചു. ഓള് കേരള എല്പിഎസ്ടി റാങ്ക് ഹോള്ഡേഴ്സ് അസോസിയേഷന് (മലയാളം) നടത്തുന്ന അനിശ്ചിതകാല നിരാഹാര സമരത്തിന്റെ ഭാഗമായിട്ടായിരുന്നു പ്രതിഷേധം. എറണാകുളം, പത്തനംതിട്ട, മലപ്പുറം, കോട്ടയം, തൃശൂര്, തിരുവനന്തപുരം എന്നീ ജില്ലകളില് മാത്രമാണ് ആദ്യ റാങ്കുകാര്ക്ക് നിയമന ശുപാര്ശ ലഭിച്ചത്.
