തിരുവനന്തപുരം: എസ്എംവി സ്കൂളില് പിടിഎ ഫണ്ട് എന്നപേരില് കമ്മിറ്റി നടത്തിയത് ലക്ഷങ്ങളുടെ പണപ്പിരിവ്. കൂടാതെ സ്കൂളിലെ തേക്കു മരവും മുറിച്ചു കടത്തി. വിദ്യാഭ്യാസ വകുപ്പിന്റെയോ നഗരസഭയുടെയോ അനുമതിയില്ലാതെയാണ് മരം മുറിച്ച് കടത്തിയത്.
വിദ്യാഭ്യാസ വകുപ്പിന്റെയും കഴിഞ്ഞ കാലങ്ങളിലെ നഗരസഭ ഭരണ സമിതിയുടെയും പിന്തുണയോടെയാണ് സിപിഎം നേതൃത്വത്തിലുള്ള പിടിഎ കമ്മറ്റി അനധികൃത പിരിവ് നടത്തിയത്. ആറ്റുകാല് ഉത്സവത്തിനുമാത്രമല്ല ഇടയ്ക്കിടെ സമീപത്തെ കടകളില് നിന്നും പണം പിരിക്കുന്നതായാണ് പുറത്തുവരുന്ന വിവരം. എസ്എംവി സ്കൂളിലെ പിടിഎയുടെ നിയമവിരുദ്ധ പ്രവര്ത്തനങ്ങള്ക്കെതിരെ നടപടി ആവശ്യപ്പെട്ട് മന്ത്രിക്കും വിദ്യാഭ്യാസ വകുപ്പിനും പരാതി നല്കിയിരിക്കുകയാണ് നഗരസഭ. വിദ്യാര്ത്ഥികളുടെ പേരില് പിടിഎ പ്രസിഡന്റും മെമ്പറും ചേര്ന്ന് സ്കൂളിനെ നാണംകെടുത്തി പണപ്പിരിവ് നടത്തിയതിനെതിരെ രക്ഷകര്ത്താക്കളില് നിന്നും പ്രതിഷേധം ഉയരുന്നു.
ആറ്റുകാല് പൊങ്കാലയോടനുബന്ധിച്ച് പാര്ക്കിങ് കേന്ദ്രങ്ങളില് അനധികൃതമായി അമിത തുക ഈടാക്കിയതായി വലിയ ആക്ഷേപം ഉയര്ന്നിരുന്നു. ഐരാണിമുട്ടത്തും കിഴക്കേകോട്ട ഗാന്ധിപാര്ക്കിലും ഈഞ്ചക്കലിലുമാണ് പൊങ്കാല അര്പ്പിക്കാനെത്തിയവരില് നിന്ന് അമിതതുക പിരിച്ചെടുത്തതായി പരാതി ഉയര്ന്നത്. ഇതിനു പിന്നാലെയാണ് സ്കൂളിലെ പണപ്പിരിവ് കണ്ടെത്തുന്നത്.
എസ്എംവി സ്കൂള് പിടിഎ സ്കൂള് ഡെവലപ്മെന്റ് ഫണ്ട് പിടിഎ എന്നു പ്രിന്റ് ചെയ്ത കൂപ്പണ് ഉപയോഗിച്ചാണ് പണപ്പിരിവ്. വ്യാജ രേഖകള് നിര്മിച്ച് സംസ്ഥാന സര്ക്കാരിന്റെ സ്ഥലത്ത് ക്ഷേത്രത്തില് ആരാധനയ്ക്കു വന്നവരുടെ കൈയില് നിന്നു പണപ്പിരിവ് നടത്തുന്ന ഗുരുതരമായ ക്രമക്കേടാണ് പിടിഎ കമ്മിറ്റിയുടെ ഭാഗത്ത് നിന്ന് ഉണ്ടായത്. കോര്പ്പറേഷനു വേണ്ടി നഗരസഭ സെക്രട്ടറി തമ്പാനൂര് പോലീസ് സ്റ്റേഷനില് പരാതി കൊടുത്തു. വിദ്യാഭ്യാസ സ്റ്റാന്ഡിംങ് കമ്മിറ്റി വിദ്യാഭ്യാസ മന്ത്രിക്കും വകുപ്പിനും പരാതി നല്കിയിരിക്കുകയാണ്.
പണം കൊടുത്തില്ലെങ്കില് വ്യാപാരികളെ ഭീഷണിപ്പെടുത്തുന്ന നിലപാടാണ് പിടിഎയ്ക്കുള്ളത്. പിടിഎ അംഗത്തിന്റെ പ്രസില് അച്ചടിച്ച കൂപ്പണ് ആണ് പിരിവിന് ഉപയോഗിക്കുന്നത്. കഴിഞ്ഞ കുറേ കാലമായി ഒരു മാഫിയയാണ് സ്കൂളിനെ നിയന്ത്രിക്കുന്നത്. അധ്യാപകര് പോലും ഇവരെ ഭയന്നാണ് നില്ക്കുന്നത്. രാത്രികാലങ്ങളില് പല കാര്യങ്ങള്ക്കും സ്കൂള് ഗ്രൗണ്ട് വാടകയ്ക്ക് കൊടുക്കുന്നതായും പരാതിയുണ്ട്. സ്കൂളിനകത്ത് പിടിഎയുടെ അനുമതിയോടെ നടത്തിയിരുന്ന തട്ടുകട വകുപ്പ് മന്ത്രി ഇടപെട്ടാണ് പൊളിച്ചുമാറ്റിയത്. പിടിഎയുടെ ക്രമവിരുദ്ധമായ പ്രവര്ത്തനങ്ങളെക്കുറിച്ച് വിദ്യാഭ്യാസ വകുപ്പും പോലീസും അന്വേഷിക്കണമെന്ന് മേയര് വി.വി. രാജേഷ് ആവശ്യപ്പെട്ടിട്ടുണ്ട്.
