തിരുവനന്തപുരം: ജി. സുധാകരന് തന്റെ പരിഭവം ഫേസ്ബുക്കിലൂടെ പ്രകടിപ്പിച്ചതാണെന്നും അദ്ദേഹം പാര്ട്ടിക്ക് ബുദ്ധിമുട്ടുണ്ടാക്കുന്ന ഒന്നും ചെയ്യില്ലെന്നും സി.പി.എം ജനറല് സെക്രട്ടറി എം.എ. ബേബി. മെമ്പര്ഷിപ് പുതുക്കില്ലെന്ന് സുധാകരന് പറഞ്ഞതിനോടു പ്രതികരിക്കുകയായിരുന്നു ബേബി. സുധാകരന്റെ അനുഭവ സമ്പത്തും കഴിവും എല്ലാം സിപിഎമ്മിനും ഇടതുപക്ഷ ജനാധിപത്യ മുന്നണിക്ക് സഹായകമായ വിധത്തില് അദ്ദേഹം ഉപയോഗിക്കും എന്നാണ് പ്രതീക്ഷയെന്നും ബേബി പറഞ്ഞു.
അദ്ദേഹത്തില്നിന്ന് സി.പി.എമ്മിന് ബുദ്ധിമുട്ടുണ്ടാക്കുന്ന ഒന്നും ഉണ്ടാവില്ല. യാതൊരു തരത്തിലുള്ള മോശമായ കാര്യങ്ങളും ഉണ്ടാവില്ല. അദ്ദേഹത്തെ പാര്ട്ടി സഖാക്കള് ബന്ധപ്പെടുന്നുണ്ട്. അദ്ദേഹം പറഞ്ഞതിന്റെ വിശദാംശങ്ങളിലേക്ക് ഇപ്പോള് പോകേണ്ട കാര്യമില്ല. മുതിര്ന്ന നേതാക്കന്മാരെല്ലാം പാര്ട്ടിക്കും പ്രസ്ഥാനത്തിനും സഹായകരമായ നിലപാട് സ്വീകരിച്ചു പോകുന്നവരാണ്. സി.പി.എമ്മിനെയും ഇടതുപക്ഷത്തെയും സംബന്ധിച്ചിടത്തോളം വളരെ നിര്ണായകമായ നിയമസഭാ തെരഞ്ഞെടുപ്പാണ് ഇപ്പോള് നടക്കുന്നതെന്നും ബേബി പറഞ്ഞു.
