തിരുവനന്തപുരം: മിനിമം വേതനം 40,000 രൂപയാക്കണമെന്നാവശ്യപ്പെട്ട് യുണൈറ്റഡ് നഴ്സസ് അസോസിയേഷന്റെ(യുഎന്എ) നേതൃത്വത്തില് നഴ്സുമാര് സെക്രട്ടേറിയറ്റ് മാര്ച്ച് നടത്തി. സംസ്ഥാനത്തെ 490 സ്വകാര്യ ആശുപത്രികളിലെ ആയിരക്കണക്കിന് നഴ്സുമാരാണ് പണിമുടക്കി സെക്രട്ടേറിയറ്റ് മാര്ച്ചില് പങ്കാളികളായത്.
പാളയം രക്തസാക്ഷി മണ്ഡപത്തില് നിന്ന് ആരംഭിച്ച മാര്ച്ച് സെക്രട്ടേറിയറ്റിനു മുന്നില് രമേശ് ചെന്നിത്തല എംഎല്എ ഉദ്ഘാടനം ചെയ്തു. 2018ലാണ് അവസാനമായി ശമ്പള പരിഷ്കരണം നടന്നതെന്നും നിലവിലെ ജീവിതച്ചെലവ് അനുസരിച്ച് ഇത് ഒട്ടും പര്യാപ്തമല്ലെന്നും യുഎന്എ ഭാരവാഹികള് പറഞ്ഞു.
സെക്രട്ടേറിയറ്റ് മാര്ച്ചില് യുഎന്എ ദേശീയ പ്രസിഡന്റ് ജാസ്മിന് ഷാ അധ്യക്ഷനായി. മുന് ആരോഗ്യമന്ത്രി ഷിബു ബേബി ജോണ്, മാധ്യമപ്രവര്ത്തകന് ഷാജന് സ്കറിയ, നഴ്സസ് അസോസിയേഷന് ദേശീയ സെക്രട്ടറി സുദീപ് എം.വി., സംസ്ഥാന പ്രസിഡന്റ് ഷോബി ജോസഫ്, ജനറല് സെക്രട്ടറി അജയ് വിശ്വംഭരന് തുടങ്ങിയവര് സംസാരിച്ചു.
തുടര്ന്ന് നഴ്സുമാര് മാനവീയം വീഥിയിലേക്ക് മാര്ച്ച് ചെയ്തെത്തി. അവിടെ നടന്ന പൊതുസമ്മേളനത്തില് വിവിധ രംഗത്തുള്ളവര് പിന്തുണ അര്പ്പിച്ചെത്തി. സമ്മേളനം കെ.സി. വേണുഗോപാല് എംപി ഉത്ഘാടനം ചെയ്തു. ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര് മുഖ്യാതിഥിയായി. മേയര് വി.വി. രാജേഷ്, ബിജെപി സംസ്ഥാന ജനറല് സെക്രട്ടറി അനൂപ് ആന്റണി, എംഎല്എമാരായ മാത്യു കുഴല്നാടന്, കൗണ്സിലര് ശബരി നാഥന്, ആശ പ്രവര്ത്തകരുടെ നേതാവ് എസ്. മിനി തുടങ്ങിയവര് സംസാരിച്ചു.
തങ്ങളുടെ ആവശ്യങ്ങള് അവഗണിക്കുകയും ചര്ച്ചയ്ക്കുപോലും തയ്യാറാകാതിരിക്കുകയും ചെയ്യുന്ന സംസ്ഥാന സര്ക്കാരിന്റെയും ആരോഗ്യവകുപ്പിന്റെയും നടപടിയില് പ്രതിഷേധിച്ച് നഴ്സുമാര് ഇന്നു മുതല് സ്വകാര്യ ആശുപത്രികളില് സമ്പൂര്ണ പണിമുടക്കിലേക്ക് കടക്കും. ഇപ്പോള് കിടക്കുന്ന രോഗികളെ മറ്റ് സര്ക്കാര് ആശുപത്രികളിലേക്ക് മാറ്റിയതിന് ശേഷം മാര്ച്ച് 9 മുതല് തൃശൂരില് നിന്ന് തിരുവനന്തപുരത്തേക്ക് ലോങ്ങ് മാര്ച്ച് തുടങ്ങാനും തയാറെടുക്കുകയാണ് നഴ്സുമാര്.
