കൊല്ലം: ശബരിമല ദ്വാരപാലക ശില്പത്തിലെ സ്വര്ണം കൊള്ള ചെയ്ത കേസില് ദേവസ്വം ബോര്ഡ് മുന് പ്രസിഡന്റും എംഎല്എയുമായിരുന്ന എ. പത്മകുമാറിന്റെ ജാമ്യാപേക്ഷയില് കൊല്ലം വിജിലന്സ് കോടതി ഇന്ന് വിധി പറയും.
അറസ്റ്റിലായി 90 ദിവസം പൂര്ത്തിയായിട്ടും കുറ്റപത്രം സമര്പ്പിക്കാത്ത സാഹചര്യത്തില് സ്വാഭാവിക ജാമ്യത്തിന് അര്ഹനെന്നാണ് ജാമ്യാപേക്ഷയില് പറയുന്നത്. നേരത്തെ കട്ടിളപ്പാളിയിലെ സ്വര്ണം അപഹരിച്ച കേസില് കഴിഞ്ഞ മാസം 20ന് പത്മകുമാറിന് സ്വാഭാവിക ജാമ്യം ലഭിച്ചിരുന്നു. ദ്വാരപാലക ശില്പ കേസില് ജാമ്യം ലഭിച്ചാല് ഇന്ന് ജയില്മോചിതനാകും. നവംബര് 20നാണ് പത്മകുമാര് അറസ്റ്റിലായത്.
ശബരിമല കേസുകളില് അറസ്റ്റിലായി റിമാന്ഡില് കഴിയുന്ന ചെന്നൈ സ്മാര്ട്ട് ക്രിയേഷന്സ് ഉടമ പങ്കജ് ഭണ്ഡാരി ചികിത്സാ ആവശ്യവുമായി സമര്പ്പിച്ച അപേക്ഷയില് നാളെ വാദം തുടരും. ത്വക്ക് രോഗത്തിന് ചെന്നൈയിലെ സ്വകാര്യ ആശുപത്രിയിലാണ് ചികിത്സ. നിലവില് ചികിത്സയില് കഴിയുന്ന തിരുവനന്തപുരം മെഡിക്കല് കോളജ് ആശുപത്രിയില് നിന്ന് കോടതി റിപ്പോര്ട്ട് തേടിയിരുന്നു. എന്നാല് അതിന് പ്രോസിക്യൂഷന് കൂടുതല് സമയം തേടിയ പശ്ചാത്തലത്തിലാണ് വാദം നാളേക്ക് മാറ്റിയത്. സര്ക്കാര് ആശുപത്രിക്ക് പകരം കേരളത്തിലെ സ്വകാര്യ ആശുപത്രിയില് ചികിത്സ ലഭ്യമാക്കണമെന്നാണ് പങ്കജിന്റെ ആവശ്യം. ചികിത്സയുടെ ഗൗരവം വെളിപ്പെടുത്തി മൊഴി നല്കാന് പങ്കജിന്റെ ബന്ധുക്കളും ഇന്നലെ കോടതിയില് എത്തിയിരുന്നു.
