തൃശൂര്: സംസ്ഥാനത്തെ സര്വകലാശാലകള് അടക്കം ഉന്നത വിദ്യാഭ്യാസ മേഖലയിലെ സ്ഥാപനങ്ങളുടെ റാങ്കിങ് പട്ടിക പ്രഖ്യാപിച്ചു. ഉന്നത വിദ്യാഭ്യാസ മന്ത്രി ആര്. ബിന്ദുവാണ് വാര്ത്താസമ്മേളനത്തില് റാങ്ക് പ്രഖ്യാപനം നടത്തിയത്. കുസാറ്റാണ് സംസ്ഥാനത്തെ മികച്ച സര്വകലാശാല. ആര്ട്ട്സ് ആന്ഡ് സയന്സ് കോളജ് വിഭാഗത്തില് എറണാകുളം രാജഗിരി കോളജ് ഓഫ് സോഷ്യല് സയന്സിനാണ് (ഓട്ടോണമസ്) ഒന്നാം സ്ഥാനം.
എറണാകുളം സെന്റ് തെരേസാസ് കോളജ്, തൃശൂര് വിമല കോളജ് എന്നിവയ്ക്കാണ് യഥാക്രമം രണ്ടും മൂന്നും സ്ഥാനം. കേരളത്തിലെ ഉന്നതവിദ്യാഭ്യാസ മേഖലയുടെ ഗുണനിലവാരം വിലയിരുത്തുന്നതിനും കൂടുതല് മെച്ചപ്പെടുത്തുന്നതിനുമായി സര്ക്കാര് ഉന്നത വിദ്യാഭ്യാസ കൗണ്സില് വഴി ആവിഷ്കരിച്ച കേരള ഇന്സ്റ്റിറ്റിയൂഷണല് റാങ്കിങ് ഫ്രെയിംവര്ക്കിന്റെ (കെഐആര്എഫ്) രണ്ടാമത് എഡിഷന് ഫലപ്രഖ്യാപനമാണ് നടന്നത്. ദേശീയതലത്തിലുള്ള റാങ്കിങ് സംവിധാനമായ എന്ഐആര്എഫില് നിന്ന് വ്യത്യസ്തമായി സംസ്ഥാനത്തെ ഉന്നതവിദ്യാഭ്യാസ സ്ഥാപനങ്ങളുടെ മികവ് ലോകനിലവാരത്തിലേക്ക് ഉയര്ത്താന്, കേരളത്തിന്റെ സവിശേഷ സാമൂഹിക പശ്ചാത്തലം പരിഗണിച്ചാണ് റാങ്കിങ് തയാറാക്കുന്നത്.
ഈ വര്ഷം ആകെ 519 സ്ഥാപനങ്ങള് റാങ്കിങില് പങ്കെടുത്തതായി മന്ത്രി അറിയിച്ചു. മികച്ച രണ്ടാമത്തെ സര്വകലാശാല കോട്ടയം എംജിയാണ്. കാലിക്കറ്റ് സര്വകലാശാല മൂന്നാം സ്ഥാനം കരസ്ഥമാക്കി. എന്ജിനീയറിങ് കോളജുകളുടെ വിഭാഗത്തില് തിരുവനന്തപുരം സിഇടി, കൊല്ലം ടികെഎം, എറണാകുളം രാജഗിരി എന്നിവ യഥാക്രമം ഒന്ന ്മുതല് മൂന്ന് വരെ സ്ഥാനത്തിനര്ഹമായി. എറണാകുളം രാജഗിരി ബിസിനസ് സ്കൂളിനാണ് മാനേജ്മെന്റ് കോഴ്സുകളുടെ വിഭാഗത്തില് ഒന്നാം സ്ഥാനം. നഴ്സിങ് കോളജുകളുടെ വിഭാഗത്തില് മലപ്പുറം മിംസ് കോളജ് ഓഫ് നഴ്സിങ്ങും ടീച്ചര് എഡ്യൂക്കേഷനില് കോഴിക്കോട് ഫാറൂഖ് ട്രെയ്നിങ് കോളജും ഒന്നാം റാങ്കുകാരായി. വെള്ളായണി കോളജ് ഓഫ് അഗ്രികള്ച്ചറിനാണ് അഗ്രികള്ച്ചര് -അനുബന്ധ മേഖലയില് ഒന്നാം റാങ്ക്. സര്വകലാശാലാ വിഭാഗത്തില് ഒന്നാം റാങ്ക് നേടുന്ന സ്ഥാപനത്തിന് അഞ്ച് ലക്ഷം രൂപയുടെ മുഖ്യമന്ത്രിയുടെ അവാര്ഡ് സമ്മാനിക്കും. മറ്റ് ഓരോ വിഭാഗങ്ങളിലും ഒന്നാം റാങ്ക് നേടുന്ന സ്ഥാപനങ്ങള്ക്ക് രണ്ട് ലക്ഷം രൂപ വീതമുള്ള ഉന്നതവിദ്യാഭ്യാസ മന്ത്രിയുടെ അവാര്ഡും സമ്മാനിക്കും.
