നെടുമങ്ങാട് : സിപിഎം നേതാവും വെള്ളനാട് പഞ്ചായത്ത് പ്രസിഡന്റുമായ വെള്ളനാട് ശശിയുടെ ധിക്കാരപരമായ നിലപാടുകളും നിയമലംഘനങ്ങളും പാര്ട്ടിയെ കടുത്ത പ്രതിസന്ധിയിലാക്കുന്നു.
പാര്ട്ടി നേതൃത്വത്തിന്റെ നിര്ദ്ദേശങ്ങള് പോലും അവഗണിച്ച് സ്വന്തം ഇഷ്ടപ്രകാരം പ്രവര്ത്തിക്കുന്ന ശശിയുടെ നടപടികള് പ്രാദേശിക ഘടകങ്ങളില് വലിയ പ്രതിഷേധത്തിന് കാരണമായിട്ടുണ്ട്.പലപ്പോഴും പാര്ട്ടി നേതൃത്വം നല്കുന്ന മുന്നറിയിപ്പുകള് അദ്ദേഹം പുച്ഛിച്ചു തള്ളുകയാണ്. കോണ്ഗ്രസില് നിന്ന് 2024ല് സിപിഎമ്മിലേക്ക് എത്തിയ ശശി, വന്ന കാലം മുതല് പാര്ട്ടിയെ പ്രതിരോധത്തിലാക്കുന്ന നടപടികളാണ് സ്വീകരിക്കുന്നത്.
പൊതുമുതല് നശിപ്പിക്കല്, ഉദ്ഘാടനത്തിന് ക്ഷണിക്കാത്തതില് പ്രതിഷേധിച്ച് ശിലാഫലകം തല്ലിത്തകര്ക്കുകയും ഫ്ലക്സ് ബോര്ഡുകളില് നിന്ന് സ്വന്തം ചിത്രം വെട്ടിമാറ്റുകയും ചെയ്ത ചരിത്രവും ഇദ്ദേഹത്തിനുണ്ട്. ശശിക്കെതിരേ 25 ക്രിമിനല് കേസുകളാണുള്ളത്. ഇതില് പലകേസുകളിലും അറസ്റ്റുചെയ്യപ്പെട്ടിട്ടുമുണ്ട്.
കഴിഞ്ഞയാഴ്ച പഞ്ചായത്ത് സെക്രട്ടറിയെ ജാതിപറഞ്ഞ് അധിക്ഷേപിച്ചു എന്ന പരാതിയും പോലീസിനു ലഭിച്ചിട്ടുണ്ട്. വെള്ളനാട്ട് വ്യക്തിയുടെ പുരയിടത്തില്നിന്ന് മണ്ണിടിച്ച സംഭവത്തില് ടിപ്പര് ലോറി പിടിച്ചെടുത്തപ്പോള് വില്ലേജോഫീസിലെത്തി ഓഫീസറെ ഭീഷണിപ്പെടുത്തല്, വെള്ളനാട് പഞ്ചായത്ത് മുന് വൈസ് പ്രസിഡന്റ് വെള്ളനാട് ശ്രീകണ്ഠനെ ഓഫീസില് കയറി മര്ദിക്കല്, മുന് പഞ്ചായത്ത് പ്രസിഡന്റ് രാജേശ്വരിയെ ഓഫീസില് കയറി അസഭ്യംപറയല് തുടങ്ങിയവയിലെല്ലാം ശശിക്കെതിരെ കേസുണ്ട്.
മുണ്ടേല രാജീവ് ഗാന്ധി റെസിഡെന്സ് വെല്ഫെയര് സഹകരണസംഘം പ്രസിഡന്റ് എം. മോഹനകുമാര് ആത്മഹത്യചെയ്തതിലും വെള്ളനാട് ശശിക്കെതിരേ മോഹനകുമാറിന്റെ കുടുംബം പരാതി നല്കിയിരുന്നു. ശശി കോണ്ഗ്രസിലായിരിക്കേ, തെരഞ്ഞെടുപ്പുകള്ക്കായി കോടിക്കണക്കിനു രൂപ പല പേരിലും വായ്പയെടുത്തെന്നും ഇത് തന്റെ സ്വത്തുക്കള് വിറ്റാണ് തിരികെയടച്ചതെന്നും മോഹനകുമാറിന്റെ ആത്മഹത്യാക്കുറുപ്പില് പറഞ്ഞിരുന്നു. സിപണ്ടിഎമ്മില് ചേര്ന്ന ശേഷം വ്യാജപ്രചാരണങ്ങള് നടത്തി സഹകകരണസംഘത്തെ തകര്ക്കുകയായിരുന്നുവെന്നും കുടുംബം ആരോപിച്ചിരുന്നു.
മുള്ളന്പന്നിയെ തല്ലിക്കൊന്നുവെന്നതാണ് ഏറ്റവും പണ്ടുതിയ കേസ്. വനംവകുപ്പിനെ അറിയിക്കാതെ ഇരുമ്പ് പൈപ്പ് ഉപയോഗിച്ച് അടിച്ചുകൊന്നതാണ് ശശിയെ ഏറ്റവും ഒടുവില് കുടുക്കിയിരിക്കുന്നത്. ഇതിന് വനംവകുപ്പൊന്നും വേണ്ട, ഞാന് നോക്കിക്കൊള്ളാം’ എന്ന് പറഞ്ഞ് നാട്ടുകാരുടെ വിലക്ക് ലംഘിച്ചായിരുന്നു ഈ കൃത്യം. നിലവില് ഫോണ് സ്വിച്ച് ഓഫ് ചെയ്ത് ഒളിവില് കഴിയുന്ന ശശിയെ കണ്ടെത്താന് വനംവകുപ്പ് അന്വേഷണം ഊര്ജിതമാക്കിയിരിക്കുകയാണ്.
പാര്ട്ടി നിയമങ്ങള്ക്കും കീഴ് വഴക്കങ്ങള്ക്കും നിരക്കാത്ത ‘ഗുണ്ടാ’ ശൈലി അണികള്ക്കിടയില് കടുത്ത അതൃപ്തി ഉണ്ടാക്കിയിട്ടുണ്ട്. നിരന്തരമായ നിയമലംഘനങ്ങള് പാര്ട്ടിയുടെ പ്രതിച്ഛായയ്ക്ക് മങ്ങലേല്പ്പിക്കുന്ന സാഹചര്യത്തില്, കര്ശനമായ അച്ചടക്ക നടപടി വേണമെന്ന ആവശ്യം പ്രാദേശിക തലത്തില് ശക്തമാണ്.
