പുതുച്ചേരി: ഭരണത്തിലിരുന്നപ്പോള് കോണ്ഗ്രസ് പുതുച്ചേരിയെ ദല്ഹിയിലെ ഒരു കുടുംബത്തിനുള്ള ‘എടിഎം’ ആയിട്ടാണ് കണ്ടിരുന്നതെന്ന് പ്രധാനമന്ത്രി നരേന്ദ്ര മോദി. പുതുച്ചേരിയില് 2700 കോടിയിലധികം രൂപയുടെ വികസന പദ്ധതികളുടെ ഉദ്ഘാടനവും തറക്കല്ലിടലും നിര്വഹിച്ചു സംസാരിക്കുകയായിരുന്നു പ്രധാനമന്ത്രി. പുതുച്ചേരി ഭരിച്ചിരുന്ന കോണ്ഗ്രസ് – ഡിഎംകെ സര്ക്കാരുകള് പുതുച്ചേരിയുടെ വികസന യാത്രയിലെ ‘സ്പീഡ് ബ്രേക്കറുകള്’ ആണെന്ന് അദ്ദേഹം വിശേഷിപ്പിച്ചു.
പുതുച്ചേരിയിലെ ‘ഡബിള് എന്ജിന് സര്ക്കാര്’ കേന്ദ്രഭരണ പ്രദേശത്തിന്റെ വളര്ച്ചയ്ക്ക് കൂടുതല് വേഗം പകരും. മഹാകവി സുബ്രഹ്മണ്യ ഭാരതി ദേശീയതയുടെ അഗ്നി പടര്ത്തിയതും, ശ്രീ അരവിന്ദോയും മദറും(മിറ അല്ഫാസ) ലോകത്തിന് ആത്മീയ ദര്ശനം നല്കിയതും ഈ മണ്ണില് നിന്നാണെന്നും മോദി പറഞ്ഞു.
പ്രധാനമന്ത്രി ഗ്രാമ സഡക് യോജനയ്ക്ക് കീഴിലുള്ള 41 ഗ്രാമീണ റോഡുകള്, ഹെറിറ്റേജ് ടൗണ് വികസനം, കണ്ടല്ക്കാടുകളുടെ പുനരുദ്ധാരണം, വൈദ്യുതി വിതരണ മേഖലയിലെ പരിഷ്കരണ പ്രവര്ത്തനങ്ങള് എന്നിവ ഇതില് ഉള്പ്പെടുന്നു. പുതുച്ചേരി നഗരത്തിലെ തിരക്ക് കുറയ്ക്കുന്നതിനായി 440 കോടി രൂപയുടെ ഫ്ളൈഓവര് ഉള്പ്പെടെ 1,000 കോടി രൂപയുടെ പദ്ധതികളില് നിക്ഷേപം നടത്തുന്നുണ്ട്. ഈസ്റ്റ് കോസ്റ്റ് റോഡ് വഴി ചെന്നൈയിലേക്കുള്ള യാത്രാസമയം രണ്ട് മണിക്കൂറില് താഴെയായി കുറയും. ഈ പദ്ധതികള് പുതുച്ചേരിയെ ബെംഗളൂരു, കോയമ്പത്തൂര് തുടങ്ങിയ സാമ്പത്തിക കേന്ദ്രങ്ങളുമായി ബന്ധിപ്പിച്ചുകൊണ്ട് ടൂറിസം, വ്യാപാരം, വ്യവസായം എന്നിവക്ക് കരുത്തേകുമെന്നും പ്രധാനമന്ത്രി പറഞ്ഞു.
കേന്ദ്രമന്ത്രി ഡോ. മന്സുഖ് മാണ്ഡവ്യ, ലഫ്റ്റനന്റ് ഗവര്ണര് കെ. കൈലാസനാഥന്, മുഖ്യമന്ത്രി എന്. രംഗസാമി, നിയമസഭാ സ്പീക്കര് ആര്. സെല്വം, മറ്റ് മന്ത്രിമാര്, എംപിമാര്, എംഎല്എമാര് എന്നിവരും ചടങ്ങില് പങ്കെടുത്തു.
