ആലപ്പുഴ വഴിയുള്ള റെയില്‍പാത ഇരട്ടിപ്പിക്കലിന്റെ രണ്ടാംഘട്ടത്തിന് റെയില്‍വേ മന്ത്രാലയം 450.5 കോടി അനുവദിച്ചു

ന്യൂദല്‍ഹി: ആലപ്പുഴ വഴിയുള്ള റെയില്‍പാത ഇരട്ടിപ്പിക്കലിന്റെ രണ്ടാംഘട്ടത്തിന് റെയില്‍വേ മന്ത്രാലയം തുക അനുവദിച്ചു. തുറവൂര്‍ മാരാരിക്കുളം പാത ഇരട്ടിപ്പിക്കുന്നതിനായി 450.59 കോടി രൂപയാണ് അനുവദിച്ചത. ആലപ്പുഴ മുതല്‍ അമ്പലപ്പുഴ വരെ 12.66 കിലോമീറ്റര്‍പാത ഇരട്ടിപ്പിക്കാന്‍ ഫെബ്രുവരി ആദ്യം 324 കോടി രൂപ അനുവദിച്ചിരുന്നു. ട്രെയിന്‍യാത്രികരുടെ ചിരകാല അഭിലാഷമായ ഈ പാതയുടെ ഇരട്ടിപ്പിക്കലിനോട് റെയില്‍വേ മന്ത്രാലയം അനുഭാവപൂര്‍ണ്ണമായ നിലപാടാണ് സ്വീകരിക്കുന്നത്. ഈ ഭാഗത്തു രണ്ടാം പാത വരുന്നതോടെ ആലപ്പുഴ മുതല്‍ തിരുവനന്തപുരം വരെ ഇരട്ടപ്പാതയാകും. ഈ റൂട്ടില്‍ കൂടുതല്‍ ട്രെയിനുകള്‍ ഓടിക്കാനും സാധ്യതയേറും. ആലപ്പുഴ വഴിയുള്ള പാതയില്‍ കായംകുളം മുതല്‍ അമ്പലപ്പുഴ വരെയാണ് ഇരട്ടപ്പാതയുള്ളത്.