തിരുവനന്തപുരം: സംസ്ഥാന സര്ക്കാര് ജീവനക്കാര്ക്ക് അഷ്വേര്ഡ് പെന്ഷന് പദ്ധതി ഏപ്രില് ഒന്നുമുതല് നടപ്പാക്കിക്കൊണ്ട് ധനവകുപ്പ് ഉത്തരവ് ഇറക്കിയെങ്കിലും അത് പേരിനൊരു നടപടിക്രമം മാത്രമാണ്. പദ്ധതിയുടെ വിശദാംശങ്ങളൊന്നും ഉത്തരവിലില്ല. നടപ്പാക്കുന്നതിന് ആവശ്യമായ ചട്ടങ്ങളോ ഫണ്ട് മാനേജ്മെന്റ് നടപടിക്രമങ്ങളോ തയ്യാറാക്കിയിട്ടുമില്ല. ആസന്നമായ തരഞ്ഞെടുപ്പ് ലക്ഷ്യം വച്ചുള്ള രാഷ്ട്രീയ പ്രഖ്യാപനം മാത്രമാണിത്. പദ്ധതി അടുത്ത സര്ക്കാരിന്റെ പെടലിക്ക് വച്ചുകൊടുക്കുകയാണ് ഫലത്തില് ചെയ്തിരിക്കുന്നത്. ബജറ്റില് പ്രഖ്യാപിക്കുകയും പിന്നാലെ ധന വകുപ്പ് ഉത്തരവിറക്കുകയും ചെയ്തെങ്കിലും സമീപകാലത്തൊന്നും ഇത് നടപ്പാക്കുക എളുപ്പമല്ല. വാഗ്ദാനങ്ങള് നിറവേറ്റിയെന്ന് വീമ്പിളക്കാന് മാത്രമേ ഇത്തരം ഉത്തരവുകള് പ്രയോജനപ്പെടൂ.
വിരമിക്കുന്ന സമയത്ത് ശമ്പളത്തിന്റെ പകുതി തുക പെന്ഷന് ഉറപ്പുനല്കുന്നതാണ് അഷ്വേര്ഡ് പെന്ഷന് പദ്ധതി. നിലവില് പങ്കാളിത്ത പെന്ഷന് പദ്ധതിയും നിലവിലുണ്ട്. 2026 ഏപ്രില് ഒന്നുമുതല് സര്വീസില് പ്രവേശിക്കുന്നവര്ക്ക് ഇതിലേതു വേണമെങ്കിലും തെരഞ്ഞെടുക്കാമെന്നാണ് ഉത്തരവില് പറയുന്നത്.
