ഗുരുവായൂര്: ഗുരുവായൂര് ക്ഷേത്രത്തില് ഉത്സവം കൊടിയേറി. തന്ത്രി ചേന്നാസ് ദിനേശന് നമ്പൂതിരിപ്പാട് കൊടിയേറ്റ് നിര്വഹിച്ചു. ഗുരുവായൂര് ക്ഷേത്രോത്സവത്തിന് നാന്ദികുറിച്ച് ഇന്നലെ നടന്ന വാശിയേറിയ ആനയോട്ട മത്സരത്തില് കൊമ്പന് രവികൃഷ്ണന് ജേതാവായി. രണ്ടാം തവണയാണ് രവികൃഷ്ണന് ആനയോട്ട മത്സരത്തില് ജേതാവാകുന്നത്.
2022 ലും രവികൃഷ്ണന് ആനയോട്ട മത്സരത്തില് വിജയിച്ചിട്ടുണ്ട്. ഉച്ചക്ക് നാഴികമണി മൂന്ന് അടിച്ചതോടെ ക്ഷേത്രത്തിനകത്തുവെച്ച് പാരമ്പര്യ അവകാശികള്, ആനകള്ക്ക് അണിയാനുള്ള കുടമണികള് പാപ്പാന്മാര്ക്ക് കൈമാറി. പാപ്പാന്മാര് കുടമണികളുമായി മഞ്ജുളാലിന് പരിസരത്തേക്ക് കുതിച്ച്, ഓട്ടത്തിന് തയാറായി നിര്ത്തിയ ആനകളെ അണിയിച്ചു. മാരാര് ശംഖുനാദം മുഴക്കിയതോടെ ഓട്ടമത്സരത്തിനായി മുന്നിരയില് നിന്നിരുന്ന കൊമ്പന്മാരായ ബാലു, കൃഷ്ണനാരായണന്, രവിക്യഷ്ണന് എന്നിവര് ഓട്ടമാരംഭിച്ചു. തുടക്കത്തില് ബാലുവായിരുന്നു മുന്നില്. തൊട്ടുപിന്നില് കൃഷ്ണനാരായണനും കുതിച്ചു. ഓട്ടത്തിന്റെ പകുതി പിന്നിട്ടതോടെ മൂന്നാം സ്ഥാനത്തായിരുന്ന രവികൃഷ്ണന് കുതിച്ചോടി ഒന്നാമതെത്തി. പിന്നീട് രവികൃഷ്ണനെ പിന്നിലാക്കാന് ബാലുവിനോ, കൃഷ്ണനാരായണനോ കഴിഞ്ഞില്ല. കിഴക്കേ ഗോപുര കവാടമെത്തുമ്പോള്, ബാലു രണ്ടാംസ്ഥാനത്തും, കൃഷ്ണനാരായണന് മൂന്നാം സ്ഥാനത്തുമായി. ഒന്നാമനായി ഓടിയെത്തിയ രവികൃഷ്ണന്, ക്ഷേത്രമതില്ക്കെട്ടിനകത്ത് കടന്ന് ഏഴ് ഓട്ടപ്രദക്ഷിണം പൂര്ത്തിയാക്കി സ്വര്ണക്കൊടിമരം വണങ്ങിയതോടെ രവികൃഷ്ണനെ ജേതാവായി പ്രഖ്യാപിച്ചു.
ഇനിയുള്ള ഉത്സവം 10 നാള്, ക്ഷേത്രമതില്ക്കെട്ടിന് പുറത്തുപോകാതെ ഭഗവാനെ സേവിച്ച് കഴിയാനുള്ള സൗഭാഗ്യം രവികൃഷ്ണന് മാത്രം സ്വന്തം. പത്ത് ദിവസത്തെ പ്രധാന ചടങ്ങുകളില് ആറാം വിളക്കുമുതല് സ്വര്ണക്കോലം ഏറ്റുന്നതും രവികൃഷ്ണനായിരിക്കും. 2003 ജൂണ് 25 ന് തൃത്താല സ്വദേശി ശിവശങ്കരനാണ് രവികൃഷ്ണനെ ശ്രീഗുരുവായൂരപ്പന് മുന്നില് നടയിരുത്തിയത്.
