ഗുരുവായൂര്: ഗുരുവായൂര് ക്ഷേത്രോത്സവത്തിന് ഇന്ന് കൊടിയേറ്റ്. ഉച്ചക്ക് മൂന്നിന് ഉത്സവാഘോഷത്തിന് നാന്ദികുറിക്കുന്ന ആനയോട്ടവും നടക്കും. കുംഭമാസത്തിലെ പൂയം നക്ഷത്രമായ ഇന്ന് സന്ധ്യയ്ക്ക് ആചാര്യവരണ ചടങ്ങുകള്ക്ക് ശേഷം കൊടിയേറ്റ് നടക്കും.
ക്ഷേത്രം തന്ത്രിമുഖ്യന് കൊടിയേറ്റ് ചടങ്ങുകള്ക്ക് നേതൃത്വം നല്കും. ക്ഷേത്രോത്സവം തുടങ്ങിയാല് മേല്പ്പത്തൂര് ഓഡിറ്റോറിയത്തിലും, ഓഡിറ്റോറിയത്തിന് സമീപത്തുമായി ഉയര്ത്തിയ പ്രത്യേക വേദികളിലുമായി കലാപരിപാടികളും നടക്കും.
ഉത്സവത്തോടനുബന്ധിച്ച് ഭക്തര്ക്ക് കഞ്ഞിയും, പുഴുക്കുമാണ് ഉത്സവനാളില് പ്രസാദമായി നല്കുക. ഉത്സവത്തിന്റെ രണ്ടാം ദിവസം മുതല് തിടമ്പ് കിഴക്കെ നടയിലെ വടക്കിനി മുറ്റത്ത് സ്വര്ണ പഴുക്കാമണ്ഡപത്തില് എഴുന്നെള്ളിച്ചുവയ്ക്കും. 8ന് ഭഗവാന്റെ പള്ളിവേട്ടയും, 9ന് ആറാട്ടിന് ശേഷം കൊടിയിറക്കത്തോടെ ഈ വര്ഷത്തെ ഉത്സവത്തിന് സമാപനമാകും.
ഉത്സവത്തിന്റെ നാലാം ദിവസമായ മാര്ച്ച് 3ന് ഉച്ചക്ക് ശേഷം ചന്ദ്രഗ്രഹണമാകയാല് ക്ഷേത്ര ചടങ്ങിന് മാറ്റമുണ്ടാകും. വൈകിട്ട് 6 മണിക്ക് ക്ഷേത്രനട അടയ്ക്കുന്നതും, ഗ്രഹണ ശേഷം 7.15ന് നട തുറന്ന് ക്ഷേത്രത്തിലെ ചടങ്ങുകള് ക്രമപ്രകാരം തുടരുകയും ചെയ്യും. അന്ന് അത്താഴപൂജ നിവേദ്യങ്ങളായ അപ്പം, അട, അവില് എന്നിവ ശീട്ടാക്കുന്നതല്ല. ഉച്ചക്ക് ശേഷമുള്ള പകര്ച്ച, രാത്രിയിലെ പ്രസാദ ഊട്ട് എന്നിവയും ഉണ്ടാവില്ല. അതേസമയം ഗുരുവായൂര് ദേവസ്വം പുറത്തിറക്കിയ പഞ്ചാംഗം പ്രകാരം ചന്ദ്രഗ്രഹണം സന്ധ്യയ്ക്ക് ശേഷവും തടരുന്നതിനാല് 7.15ന് നട തുറക്കുന്നത് ശരിയല്ലെന്ന് അഭിപ്രായപ്പെട്ട് ജ്യോതിഷ പണ്ഡിതര് രംഗത്തുവന്നിട്ടുണ്ട്.
