ന്യൂദല്ഹി: ശബരിമല സ്വര്ണക്കൊള്ളക്കേസിലെ മുഖ്യപ്രതി ഉണ്ണികൃഷ്ണന് പോറ്റിയും കോണ്ഗ്രസ് നേതാവ് സോണിയ ഗാന്ധിയും തമ്മിലുള്ള ബന്ധത്തെക്കുറിച്ച് അന്വേഷിക്കണമെന്നാവശ്യപ്പെട്ട് ദല്ഹിയില് യുവമോര്ച്ച മാര്ച്ച്.
സോണിയയുടെ ജന്പത് പത്താം നമ്പര് വസതിയിലേക്ക് നടത്തിയ മാര്ച്ചില് പ്രതിഷേധമിരമ്പി. യുവമോര്ച്ച കേരളം സംസ്ഥാന കമ്മിറ്റിയുടെ നേതൃത്വത്തില് നടത്തിയ മാര്ച്ചില് കേരളത്തില് നിന്നും ദല്ഹിയുടെ വിവിധ ഭാഗങ്ങളില് നിന്നുമുള്ള നൂറുകണക്കിന് പ്രവര്ത്തകര് അണിനിരന്നു. ബാരിക്കേഡുകള് മറികടന്ന് മുന്നോട്ടുനീങ്ങിയ യുവമോര്ച്ച സംസ്ഥാന പ്രസിഡന്റ് വി. മനുപ്രസാദ് അടക്കമുള്ള പ്രവര്ത്തകരെ പോലീസ് അറസ്റ്റുചെയ്ത് നീക്കി.
സ്വര്ണക്കൊള്ളക്കേസില് എസ്ഐടി നടത്തുന്ന അന്വേഷണം തൃപ്തികരമല്ലെന്നും കേസ് സിബിഐക്ക് വിടണമെന്നും മാര്ച്ച് ഉദ്ഘാടനം ചെയ്ത മുന് കേന്ദ്രമന്ത്രിയും യുവമോര്ച്ച മുന് ദേശീയ അധ്യക്ഷനുമായ അനുരാഗ് സിങ് താക്കൂര് എംപി അവശ്യപ്പെട്ടു.
കേസിലെ മുഖ്യപ്രതി ഉണ്ണികൃഷ്ണന് പോറ്റിയും കോണ്ഗ്രസ് നേതാവ് സോണിയ ഗാന്ധിയും നടത്തിയ കൂടിക്കാഴ്ചകള് ദുരൂഹമാണ്. എസ്ഐടിയുടെ അന്വേഷണം കൊണ്ട് കേസ് തെളിയുമെന്ന് തോന്നുന്നില്ല. അയ്യപ്പന്റെ സ്വര്ണ്ണം കവര്ന്നവരുമായി കോണ്ഗ്രസ് ഹൈക്കമാന്ഡിന് നേരിട്ട് ബന്ധമുണ്ട്. കോടിക്കണക്കിന് അയ്യപ്പഭക്തരുടെ ചോദ്യങ്ങള്ക്ക് സോണിയയും കുടുംബവും മറുപടി പറയണമെന്നും അദ്ദേഹം ആവശ്യപ്പെട്ടു.
യുവമോര്ച്ച ദേശീയ ജനറല് സെക്രട്ടറി രോഹിത് ചാഹല്, സംസ്ഥാന അധ്യക്ഷന് വി. മനുപ്രസാദ്, ദേശീയ നിര്വാഹക സമിതി അംഗം റോഹന് സൈഗാള്, സംസ്ഥാന ജനറല് സെക്രട്ടറിമാരായ വിഷ്ണു വഞ്ചിമല, ഗോകുല് ഗോപിനാഥ് എന്നിവര് സംസാരിച്ചു. യുവമോര്ച്ച സംസ്ഥാന വൈസ് പ്രസിഡന്റുമാരായ അഖില് വര്ഗീസ്, കെ. ഷിജില്, അഭിജിത്ത് അശോകന്, വിഷ്ണു, സംസ്ഥാന സെക്രട്ടറിമാരായ അഥീന ഭാരതി, മനു മോഹന്, അര്ജുന് എന്നിവര് നേതൃത്വം നല്കി.
