ന്യൂദല്ഹി: ട്രംപ് പോലും ഭയയ്ക്കുന്ന നേതാവായി മോദി മാറിയെന്നും മോദിയോട് ഏറെ ആദരവ് തോന്നിയെന്നും ഗാനരചയിതാവ് ശ്രീകുമാരന്തമ്പി. ജീവിതത്തില് ഒരു രാഷ്ട്രീയ നേതാവിനും തോന്നാത്ത ആദരവ് തനിക്ക് മോദിയോട് തോന്നിയെന്നും ശ്രീകുമാരന്തമ്പി പറഞ്ഞു.
കേരളയെ കേരളം ആക്കി മാറ്റിയ തീരുമാനമെടുത്ത പ്രധാനമന്ത്രി മോദിയെ പ്രശംസിക്കാന് കേരളത്തില് നിന്നും പോയ സാഹിത്യകാരന്മാരുടെ സംഘത്തില് ശ്രീകുമാരന്തമ്പിയും ഉണ്ടായിരുന്നു. ശ്രീകുമാരന്തമ്പി ഉള്പ്പെട്ട കേരളത്തിലെ സാഹിത്യകാരന്മാരുടെ സംഘം മോദിയുമായി കൂടിക്കാഴ്ച നടത്തിയിരുന്നു. അതിന് ശേഷമായിരുന്നു മാധ്യമങ്ങളോട് ശ്രീകുമാരന് തമ്പിയുടെ ഈ പ്രതികരണം.
‘അദ്ദേഹം ലോകനേതാവായത് എന്തുകൊണ്ടാണെന്ന് മനസ്സിലായി’
കേരള എന്ന പേര് മാറ്റി കേരളം എന്നാക്കിയതിന് നന്ദിപറയാനാണ് ഞാന് ഇവിടെ വന്നത്. എന്തുകൊണ്ടാണ് അദ്ദേഹം ഒരു ലോകനേതാവായത് എന്ന കാര്യം ഇന്നത്തെ കൂടിക്കാഴ്ചയില് ഞങ്ങള്ക്കെല്ലാവര്ക്കും ബോധ്യമായി. – ശ്രീകുമാരന് തമ്പി പറഞ്ഞു.
‘മറ്റുള്ളവരോട് എങ്ങിനെ പെരുമാറണമെന്ന് മോദി എന്നെ പഠിപ്പിച്ചു’
മോദിയുടെ പെരുമാറ്റത്തെക്കുറിച്ച് പറയുമ്പോള് തനിക്ക് പോലും മോദി ഒരു പാഠമായി എന്നാണ് ശ്രീകുമാരന് തമ്പി പ്രതികരിച്ചത്. അദ്ദേഹം സംസാരിച്ചത് സാഹിത്യത്തെക്കുറിച്ചും സമൂഹത്തെക്കുറിച്ചുമാണ്. ഞങ്ങളില് ഒരാളായിട്ടല്ല, ഞങ്ങളേക്കാള് താഴെ നിന്ന് സംസാരിക്കുന്ന ഒരാളുടെ വിനയത്തോടെയാണ് പ്രധാനമന്ത്രി മോദി ഞങ്ങളോട് സംസാരിച്ചത്. ആ വിനയം എനിയ്ക്കും ഒരു പാഠമായി. മനുഷ്യരോട് എങ്ങിനെ പെരുമാറണം എന്നതിന് വലിയ ഒരു ഉദാഹരണമായിരുന്നു അത്..- ശ്രീകുമാരന് തമ്പി പറയുന്നു. ജോര്ജ്ജ് ഓണക്കൂര്, വി. മധുസൂദനന്നായര് എന്നിവരും സംഘത്തിലുണ്ടായിരുന്നു.
