കൊല്ലം : നിയമസഭാ തിരഞ്ഞെടുപ്പില് ഇരവിപുരത്ത് വിഷ്ണുമോഹന് ആര് എസ് പി സ്ഥാനാര്ത്ഥിയാകും.ഷിബു ബേബി ജോണിന്റെ നിര്ബന്ധത്തിന് വഴങ്ങിയാണ്
ഇത്.വിഷ്ണുമോഹനെ സ്ഥാനാര്ത്ഥി ആക്കിയില്ലെങ്കില് പാര്ട്ടി വിടുമെന്ന് ഷിബു ബേബി ജോണ് ഭീഷണി മുഴക്കി.
നഷ്ടപ്പെട്ടതെല്ലാം വീണ്ടെടുക്കുക എന്ന ഒരു ലക്ഷ്യമേയുള്ളൂവെന്ന് ഷിബു ബേബി ജോണ് പറഞ്ഞു. ഏതു പാര്ട്ടിയിലും ഉണ്ടാകുന്ന തര്ക്കങ്ങളെ ഉള്ളൂ. നിലനില്പ്പിന്റെ പോരാട്ടമാണെന്നത് തിരിച്ചറിഞ്ഞാണ് ചര്ച്ച ചെയ്തത്.
ജനാധിപത്യ പ്രക്രിയയുടെ ഭാഗമായി ചില പേരുകള് നിര്ദ്ദേശിക്കപ്പെട്ടെന്നും സ്ഥാനാര്ത്ഥിയെ പ്രഖ്യാപിക്കുക യുഡിഎഫ് മുന്നണിയുമായി ചര്ച്ച ചെയ്തിട്ടായിരിക്കുമെന്നും ഷിബു ബേബി ജോണ് വ്യക്തമാക്കി. സെക്രട്ടേറിയറ്റില് ഭൂരിപക്ഷം ലഭിച്ചിട്ടും എന് കെ പ്രേമചന്ദ്രന് എം പിയുടെ മകന് കാര്ത്തിക് പ്രേമചന്ദ്രനെ ഷിബു ബേബി ജോണ് അംഗീകരിച്ചില്ല.തുടര്ന്ന് സമവായ സ്ഥാനാര്ത്ഥിയായി ആര് വൈ എഫ് നേതാവ് വിഷ്ണുമോഹന്റെ പേര് നിര്ദ്ദേശിച്ചു.
യുഡിഎഫിന്റെ ഭാഗമായി ആര്എസ്പി മത്സരിക്കുന്ന അഞ്ച് സീറ്റുകളില് നിര്ണായകമാണ് ഇരവിപുരം. കഴിഞ്ഞ രണ്ട് തിരഞ്ഞെടുപ്പുകളിലും സിപിഎമ്മിനോട് പരാജയപ്പെട്ട ഈ സീറ്റ് തിരിച്ചുപിടിക്കുക എന്നത് ആര്എസ്പിയുടെ രാഷ്ട്രീയ നിലനില്പ്പിന് അത്യാവശ്യമാണ്.നേരത്തെ മുസ്ലിം ലീഗ് മത്സരിച്ചിരുന്ന ഈ സീറ്റ് ആര്എസ്പി ഏറ്റെടുത്ത ശേഷം രണ്ടു തവണയും പരാജയപ്പെട്ടു. വിജയസാധ്യതയുള്ള സ്ഥാനാര്ത്ഥിയെ നിര്ത്തണമെന്ന ആവശ്യം ശക്തമായതോടെയാണ് വിഷയം ജില്ലാ കമ്മിറ്റിയുടെ പരിഗണനയ്ക്ക് എത്തിയത്.
ഇരവിപുരത്ത് പുതുമുഖത്തെ അവതരിപ്പിക്കണമെന്ന താല്പര്യത്തിലാണ് ഒരു വിഭാഗം കാര്ത്തിക്കിന്റെ പേര് നിര്ദ്ദേശിച്ചത്. എന്നാല് കാര്ത്തിക്കിന് രാഷ്ട്രീയ പ്രവര്ത്തന പാരമ്പര്യം കുറവാണെന്നും പരിഗണിക്കപ്പെടേണ്ട മറ്റ് നേതാക്കള് പാര്ട്ടിയിലുണ്ടെന്നുമാണ് എതിര്ക്കുന്നവരുടെ വാദം. കഴിഞ്ഞ ദിവസം ചേര്ന്ന ഇരവിപുരം മണ്ഡലം കമ്മിറ്റിയില് നടന്ന വോട്ടെടുപ്പില് ഭൂരിപക്ഷം പേരും പിന്തുണച്ചത് മണ്ഡലം സെക്രട്ടറി എന്. ഔഷാദിനെയാണ്.
