ഭാരതത്തിന്റെ ഫെഡറല് സംവിധാനത്തില് കേന്ദ്രവും സംസ്ഥാനങ്ങളും തമ്മിലുള്ള അധികാര വിഭജനം വ്യക്തമാണ്. എന്നാല്, ദേശീയ ജനസംഖ്യാ രജിസ്റ്റര് (എന് പി ആര്) നടപ്പിലാക്കില്ലെന്ന കേരള സര്ക്കാരിന്റെ വാശി, ഭരണഘടനാപരമായ തത്വങ്ങളുടെ ലംഘനവും രാജ്യത്തിന്റെ സുരക്ഷാ-വികസന താല്പര്യങ്ങള്ക്ക് വിഘാതവുമാണ്. ഈ നിലപാടിനെ വസ്തുനിഷ്ഠമായി പരിശോധിച്ചാല് പലവിധ പോരായ്മകള് പ്രകടമാകും’
ഭാരത ഭരണഘടനയുടെ ഏഴാം ഷെഡ്യൂള് പ്രകാരം സെന്സസ്, പൗരത്വം തുടങ്ങിയവ പൂര്ണ്ണമായും കേന്ദ്ര ലിസ്റ്റില് ഉള്പ്പെട്ട വിഷയങ്ങളാണ്. ആര്ട്ടിക്കിള് 256 അനുസരിച്ച്, പാര്ലമെന്റ് പാസാക്കുന്ന നിയമങ്ങള് നടപ്പിലാക്കാന് സംസ്ഥാനങ്ങള് ബാധ്യസ്ഥരാണ്. ഇതിന് വിരുദ്ധമായി ഒരു സംസ്ഥാന സര്ക്കാര് നിലപാടെടുക്കുന്നത് ഭരണഘടനാപരമായ ഒരു പ്രതിസന്ധി സൃഷ്ടിക്കും.. കേന്ദ്ര നയങ്ങളോട് രാഷ്ട്രീയമായ വിയോജിപ്പുകള് ആകാം, എന്നാല് അത് ഭരണപരമായ നിസ്സഹകരണത്തിലേക്ക് വളരുന്നത് രാജ്യത്തിന്റെ ഐക്യത്തെ ബാധിക്കും.
ഒരു രാജ്യത്തിന്റെ വികസന പദ്ധതികള് കൃത്യമായി ആസൂത്രണം ചെയ്യുന്നതിന് അവിടെയുള്ള ജനങ്ങളെക്കുറിച്ചുള്ള ആധികാരികമായ വിവരങ്ങള് അത്യാവശ്യമാണ്. അര്ഹരായ ഗുണഭോക്താക്കളെ കണ്ടെത്താനും വിഭവങ്ങള് കൃത്യമായി കൈമാറാനും എന്.പി.ആര് ഉപകരിക്കും. 2010-ലും 2015-ലും നടന്ന എന്.പി.ആര് വിവരശേഖരണത്തിന്റെ തുടര്ച്ച മാത്രമാണിത്. അന്ന് സഹകരിച്ചവര് ഇന്ന് രാഷ്ട്രീയം പറഞ്ഞ് ഇതിനെ എതിര്ക്കുന്നത് നീതീകരിക്കാനാവില്ല
രാജ്യത്തെ ജനങ്ങളുടെ വിവരങ്ങള് കൃത്യമായി രേഖപ്പെടുത്തുന്നത് ദേശീയ സുരക്ഷയ്ക്ക് അത്യന്താപേക്ഷിതമാണ്. അനധികൃത കുടിയേറ്റം തടയുന്നതിനും ആഭ്യന്തര സുരക്ഷ ഉറപ്പാക്കുന്നതിനും ഇത്തരം ഡാറ്റാബേസുകള് ലോകത്തെ എല്ലാ വികസിത രാജ്യങ്ങളിലും നിലവിലുണ്ട്. ഇതിനെ പൗരത്വവുമായി മാത്രം ബന്ധിപ്പിച്ച് ഭീതി പടര്ത്തുന്നത് ജനങ്ങളെ തെറ്റിദ്ധരിപ്പിക്കാനേ ഉപകരിക്കൂ.
കേരളത്തിന്റെ ഈ നീക്കം ഭരണപരമായ കാരണങ്ങളേക്കാള് രാഷ്ട്രീയ ലാഭത്തിനു വേണ്ടിയുള്ളതാണെന്ന വിമര്ശനം ശക്തമാണ്. സെന്സസ് നടപടികളില് നിന്ന് എന്.പി.ആറിനെ മാത്രം മാറ്റിനിര്ത്തുന്നത് ഉദ്യോഗസ്ഥ തലത്തില് വലിയ ആശയക്കുഴപ്പമുണ്ടാക്കും. ഒരു സംസ്ഥാനം മാത്രം മാറി നില്ക്കുന്നത് രാജ്യത്തിന്റെ ആകെത്തുകയിലുള്ള വിവരശേഖരണത്തെ സാരമായി ബാധിക്കുകതന്നെ ചെയ്യും.?.
ഫെഡറലിസം എന്നത് കേന്ദ്രവും സംസ്ഥാനവും തമ്മിലുള്ള പോരാട്ടമല്ല, മറിച്ച് സഹകരണമാണ്. രാഷ്ട്രീയമായ വിയോജിപ്പുകള് പ്രകടിപ്പിക്കാന് ജനാധിപത്യപരമായ മറ്റ് വഴികളുണ്ട്. എന്നാല്, രാജ്യത്തിന്റെ ഭരണഘടനാപരമായ പ്രക്രിയകളെ സ്തംഭിപ്പിക്കുന്നത് ആരോഗ്യകരമായ ഒരു കീഴ് വഴക്കമല്ല. ദേശീയ താല്പര്യത്തേക്കാള് രാഷ്ട്രീയ താല്പര്യത്തിന് മുന്തൂക്കം നല്കുന്ന ഇത്തരം നിലപാടുകള് സംസ്ഥാന സര്ക്കാര് പുന:പരിശോധിക്കണം. സംസ്ഥാന സര്ക്കാരിന്റെ എന്.പി.ആര് വിരുദ്ധത ഭരണഘടനാപരമായ ബാധ്യതകളില് നിന്നുള്ള ഒളിച്ചോട്ടമാണ്. കേരളത്തിലെ ഭൂരിപക്ഷം ജനങ്ങളും ഇത് അംഗീകരിക്കില്ല.
കെ എ സോളമന്, എസ് എല് പുരം
