മലപ്പുറം: യുവതി കുളിക്കുന്ന ദൃശ്യം മൊബൈല് ഫോണില് പകര്ത്തിയ യുവാവിന് ഒമ്പതര വര്ഷം കഠിന തടവും 25,000 രൂപ പിഴയും ശിക്ഷ. മലപ്പുറം പുഴക്കാട്ടിരി പനങ്ങാങ്ങര രാമപുരം തേവര്തൊടി സമീര് (42)നെയാണ് ശിക്ഷിച്ചത്.മഞ്ചേരി എസ്സി-എസ്ടി കോടതിയുടേതാണ് വിധി.
2023 മേയ് എട്ടിന് രാവിലെ 11നാണ് കേസിനാധാരമായ സംഭവം.20 കാരി കുളിമുറിയില് കയറിയ സമയം വീട്ടില് മറ്റാരുമില്ലെന്ന് മനസിലാക്കി പ്രതി കുളിമുറിയോട് ചേര്ന്നുള്ള ടോയ്ലറ്റില് അതിക്രമിച്ചു കയറുകയായിരുന്നു.പിന്നാലെ ചുമരിന് മുകളിലുള്ള വിടവിലൂടെ മൊബൈല് ഫോണ് അകത്തേക്ക് പിടിച്ചാണ് വീഡിയോ ചിത്രീകരിച്ചത്.
ഫോണ് കണ്ട യുവതി ബഹളം വച്ചു. ഇതോടെ പ്രതി ഫോണ് നശിപ്പിച്ചു കളഞ്ഞു.എസ്സി-എസ്ടി ആക്ട് പ്രകാരം മാനഹാനി വരുത്തിയതിന് ഏഴ് വര്ഷം കഠിന തടവും 25,000 രൂപ പിഴയും പിഴയടച്ചില്ലെങ്കില് രണ്ട് മാസത്തെ അധിക തടവുമാണ് ശിക്ഷ.ഇതിനു പുറമെ വീട്ടില് അതിക്രമിച്ചു കയറിയതിന് ആറു മാസത്തെ കഠിന തടവ്, തെളിവ് നശിപ്പിച്ചതിന് ഒരു വര്ഷത്തെ കഠിന തടവ്, കേരള പൊലീസ് ആക്ട് പ്രകാരം ഒരു വര്ഷത്തെ തടവ് എന്നിങ്ങനെയും ശിക്ഷയുണ്ട്. ശിക്ഷ ഒരുമിച്ചനുഭവിച്ചാല് മതി.
