തിരുവനന്തപുരം:സര്ക്കാര് ആശുപത്രികളിലെ വിവിധ വീഴ്ചകള് കാരണം സര്ക്കാര് ആരോഗ്യമേഖല ജനങ്ങള്ക്ക് മുന്നില് നിറം മങ്ങി നില്ക്കെ , കേരളത്തിലെ സര്ക്കാര് ആരോഗ്യമേഖലയെ തകര്ക്കാനുള്ള ആസൂത്രിത ശ്രമം നടക്കുന്നുവെന്ന ആരോപണവുമായി ആരോഗ്യമന്ത്രി വീണ ജോര്ജ്. മെച്ചപ്പെട്ട സംവിധാനങ്ങളാണ് ആരോഗ്യമേഖലയിലുള്ളതെന്നാണ് മന്ത്രി പറയുന്നത്.
കേരളത്തിലെ ആരോഗ്യ രംഗം തകര്ന്നു എന്ന് വരുത്തിത്തീര്ക്കേണ്ടത് ആരുടെ ആവശ്യമാണ്.രോഗികളെ സര്ക്കാര് ആശുപത്രികളില് നിന്ന് പുറത്തേക്ക് എത്തിക്കേണ്ടത് ആരുടെ ആവശ്യമാണ് എന്നും മന്ത്രി ചോദിച്ചു. സ്വകാര്യ കുത്തകകളുടെ ആവശ്യമാണിതെന്നാണ് മന്ത്രി പറയുന്നത്. സ്വകാര്യ കുത്തകകള്ക്ക് മുന്നില് ആരോഗ്യമേഖലയെ അടിയറവ് വയ്ക്കില്ലെന്നും വീണ ജോര്ജ് പറഞ്ഞു.
ഏറ്റവും മികച്ച രീതിയില് ആരോഗ്യമേഖലയില് ചികിത്സാ സംവിധാനങ്ങള് സര്ക്കാര് ഒരുക്കിയിട്ടുണ്ടെന്നാണ് മന്ത്രി പറയുന്നത്. എല്ലാ ജില്ലകളിലും മികച്ച സര്ക്കാര് ചികിത്സാ കേന്ദ്രങ്ങള് ഒരുക്കി.
വണ്ടാനം മെഡിക്കല് കോളേജില് ശസ്ത്രക്രിയ നടത്തിയ സ്ത്രീയുടെ ശരീരത്തില് കത്രിക കണ്ടെത്തിയ വിഷയത്തില് ചട്ടപ്രകാരം ആദ്യം സസ്പെന്ഷനാണ് നല്കാനാകുന്നത്. അതിനുശേഷം നിയമപ്രകാരമുള്ള നടപടികള്ക്കുശേഷം ആവശ്യമെങ്കില് സര്വീസില് നിന്ന് പുറത്താക്കാനാകും. വണ്ടാനം മെഡിക്കല് കോളേജിലെ സംഭവം ഏതോകാലത്ത് നടന്നതാണെന്ന് പറഞ്ഞ് താന് മന്ത്രി പദവി വഹിച്ച കാലത്തല്ല ഇത് നടന്നതെന്ന് വ്യംഗ്യമായി മന്ത്രി ചൂണ്ടിക്കാട്ടി. പഴയ സംഭവമായിട്ടും അന്വേഷണം നടത്തി നടപടിയെടുത്തു. ഇനി എന്താണ് ചെയ്യേണ്ടതെന്ന് പ്രതിപക്ഷം പറയണമെന്നും മന്ത്രി പറഞ്ഞു.
