ന്യൂദൽഹി: കോൺഗ്രസ് എംപി രാഹുൽ ഗാന്ധിയെ പിന്തുണച്ച് ജമ്മു കശ്മീർ മുഖ്യമന്ത്രി ഒമർ അബ്ദുള്ള രംഗത്തെത്തി. പ്രതിപക്ഷ പാർട്ടിയായ ഇൻഡി ബ്ലോക്കിന്റെ നേതാവായി പശ്ചിമ ബംഗാൾ മുഖ്യമന്ത്രി മമത ബാനർജിയെ പിന്തുണച്ച കോൺഗ്രസ് നേതാവ് മണിശങ്കർ അയ്യരോടുള്ള മറുപടിയായിട്ടായിരുന്നു അബ്ദുള്ളയുടെ പ്രതികരണം. അബ്ദുള്ളയുടെ പാർട്ടിയായ നാഷണൽ കോൺഫറൻസ് ഇൻഡി ബ്ലോക്കിന്റെ ഭാഗമാണ്.
ലോക്സഭയിലെ പ്രതിപക്ഷ നേതാവെന്ന നിലയിൽ രാഹുൽ ഗാന്ധി സഭയിൽ പ്രശ്നങ്ങൾ ഉന്നയിക്കുകയും എല്ലാ അവസരങ്ങളിലും ബിജെപിയെ ലക്ഷ്യം വയ്ക്കുകയും ചെയ്യാറുണ്ടെന്ന് ഒമർ അബ്ദുള്ള പറഞ്ഞു. എതിരാളികൾ ഇതിൽ നിന്ന് മറ്റെന്താണ് പ്രതീക്ഷിക്കുന്നതെന്ന് അദ്ദേഹം ചോദിച്ചു.
ഗുൽമാർഗിൽ നടന്ന ഖേലോ ഇന്ത്യ വിന്റർ ഗെയിംസിനിടെ മാധ്യമപ്രവർത്തകരോട് സംസാരിക്കവെയാണ് ഒമർ അബ്ദുള്ള ഇക്കാര്യം പറഞ്ഞത്. ബിജെപിയെ നേരിടാൻ രാഹുൽ ഗാന്ധിയിൽ എന്താണ് കുറവുള്ളത്. ബിജെപിയെ നിരന്തരം എതിർക്കുകയും എല്ലാ വിഷയങ്ങളിലും സർക്കാരിനെ ലക്ഷ്യം വയ്ക്കുകയും ചെയ്യുന്ന ഒരാളാണ് അദ്ദേഹം. ഇതാണ് പ്രതിപക്ഷ നേതാവിന്റെ ജോലി. രാഹുൽ ഗാന്ധിയിൽ നിന്ന് നിങ്ങൾക്ക് ഇതിൽ കൂടുതൽ എന്താണ് വേണ്ടത്, അദ്ദേഹത്തിൽ എന്താണ് കുറവെന്ന് ആരെങ്കിലും തന്നോട് പറയാമോ എന്നും ഒമർ ചോദിച്ചു.
