തിരുവനന്തപുരം: ആറ്റുകാല് പൊങ്കാല മഹോത്സവത്തിന് ഇന്ന് തുടക്കം കുറിക്കുകയാണ്. നഗരം പൊങ്കാലത്തിരക്കിലമര്ന്നു കഴിഞ്ഞു. കിഴക്കേകോട്ടമുതല് ആറ്റുകാല് വരെ വാഹനങ്ങളുടെയും കാല്നടയാത്രക്കാരുടെയും വന് തിരക്കാണ് അനുഭവപ്പെടുന്നത്. കാല്നടയാത്രക്കാര്ക്ക് തടസമായി ഫ്ലക്സുകള് സ്ഥാപിച്ചവര്ക്കെതിരെ കേസ് എടുത്തതും ഫൈന് ചുമത്തിയതുമൊക്കെ വാര്ത്തയായിരുന്നു. എന്നാല് ഗതാഗത നിയമലംഘനത്തിനും മറ്റുകേസുകളിലും ഫോര്ട്ട് പോലീസ് പിടികൂടിയ ഓട്ടോറിക്ഷകള് ഉള്പ്പടെയുള്ള വാഹനങ്ങള് പോലീസ് സ്റ്റേഷനുമുന്നില് ഫുട്ട്പാത്തില് നിരത്തിയിട്ടിരിക്കുകയാണ്.
ആറ്റുകാല് പൊങ്കാല പ്രമാണിച്ച് റോഡരികില് ഗതാഗതത്തിന് തടസമായി പാര്ക്ക് ചെയ്തിരിക്കുന്ന വാഹനങ്ങളും മറ്റും പോലീസ് മാറ്റിക്കൊണ്ടിരിക്കുകയാണ്. എന്നാല് ഫോര്ട്ട് പോലീസ് പിടിച്ചിട്ടിരിക്കുന്ന ഓട്ടോറിക്ഷകള് കാല്നടയാത്രക്കാര്ക്ക് തടസമായി സ്റ്റേഷന് മുന് വശത്തുള്ള ഫുട്ട്പാത്തില് കിടക്കുകയാണ്. പത്തിലധികം ഓട്ടോറിക്ഷകളാണ് ഫുട്ട്പാത്തില് പിടിച്ചിട്ടിരിക്കുന്നത്.
കുത്തിയോട്ട വ്രതമാരംഭിക്കുന്നതോടെ ആറ്റുകാല് ക്ഷേത്രത്തിലേക്കുള്ള ഭക്തരുടെ വരവ് ക്രമാതീതമായി വര്ധിക്കും. കാല്നടയായി യാത്രചെയ്യുന്നവര് ഫുട്ടപാത്തിലൂടെ നടക്കാന് കഴിയാതെ വരുമ്പോള് റോഡിലിറങ്ങി നടക്കാന് നിര്ബന്ധിതരാകും. വാഹനബാഹുല്യമുള്ള റോഡിലൂടെ ജനങ്ങള് നടക്കുന്നത് വന് അപകടങ്ങള്ക്കാകും വഴിവയ്ക്കുക.
