ന്യൂദൽഹി: അഫ്ഗാൻ അതിർത്തിയിൽ പാകിസ്ഥാൻ നടത്തിയ വ്യോമാക്രമണത്തെ ഇന്ത്യ ശക്തമായി അപലപിച്ചു. വിശുദ്ധ റമദാൻ മാസത്തിൽ അഫ്ഗാൻ പ്രദേശത്ത് പാകിസ്ഥാൻ നടത്തിയ വ്യോമാക്രമണത്തിൽ സ്ത്രീകളും കുട്ടികളും ഉൾപ്പെടെയുള്ള സാധാരണക്കാർ കൊല്ലപ്പെട്ടതിനെ ഇന്ത്യ ശക്തമായി അപലപിക്കുന്നുവെന്ന് ഇന്ത്യൻ വിദേശകാര്യ മന്ത്രാലയ വക്താവ് രൺധീർ ജയ്സ്വാൾ പറഞ്ഞു.
മറ്റുള്ളവരുടെ മേൽ കുറ്റം ചുമത്താൻ പാകിസ്ഥാൻ ശ്രമിക്കുന്നു
തങ്ങളുടെ ആഭ്യന്തര പരാജയങ്ങൾക്ക് മറ്റുള്ളവരെ കുറ്റപ്പെടുത്താനുള്ള പാകിസ്ഥാന്റെ മറ്റൊരു ശ്രമമാണിതെന്ന് രൺധീർ ജയ്സ്വാൾ പറഞ്ഞു. അഫ്ഗാനിസ്ഥാന്റെ പരമാധികാരം, പ്രദേശിക സമഗ്രത, സ്വാതന്ത്ര്യം എന്നിവയ്ക്കുള്ള പിന്തുണ ഇന്ത്യ ആവർത്തിക്കുന്നുവെന്നും അദ്ദേഹം പറഞ്ഞു.
രാജ്യത്ത് അടുത്തിടെയുണ്ടായ ആക്രമണങ്ങൾക്ക് മറുപടിയായി ശനിയാഴ്ച രാത്രിയാണ് പാകിസ്ഥാൻ അഫ്ഗാനിസ്ഥാനിലെ ഏഴ് ഭീകര ഒളിത്താവളങ്ങൾ എന്നാരോപിച്ച് സൈനിക നടപടി ആരംഭിച്ചത്. ഖൈബർ-പഖ്തൂൺഖ്വയിലെ ബന്നു പ്രദേശത്ത് ശനിയാഴ്ച നടന്ന ചാവേർ ആക്രമണത്തിൽ ഒരു സൈനിക ലെഫ്റ്റനന്റ് കേണലും ഒരു സൈനികനും കൊല്ലപ്പെട്ടു. റെസിഡൻഷ്യൽ ഏരിയകളെ ലക്ഷ്യമിട്ടാണ് ഓപ്പറേഷൻ നടത്തിയതെന്ന് കാബൂൾ ആരോപിച്ചു.
എന്നാൽ പാകിസ്ഥാനിൽ അടുത്തിടെ നടന്ന നിരവധി ചാവേർ ആക്രമണങ്ങൾക്ക് ഉത്തരവാദികളായ അഫ്ഗാൻ തീവ്രവാദ ഗ്രൂപ്പുകൾക്കെതിരെയാണ് ആക്രമണം നടത്തിയതെന്ന് പാകിസ്ഥാൻ പറഞ്ഞു. അഫ്ഗാൻ സർക്കാരിന്റെ കണക്കനുസരിച്ച് ബോംബാക്രമണങ്ങളിൽ ഡസൻ കണക്കിന് ആളുകൾ കൊല്ലപ്പെടുകയോ പരിക്കേൽക്കുകയോ ചെയ്തു.
“ശനിയാഴ്ച) രാത്രി, പാകിസ്ഥാൻ നംഗർഹാർ, പക്തിക പ്രവിശ്യകളിലെ നമ്മുടെ സാധാരണക്കാരെ ബോംബെറിഞ്ഞു, സ്ത്രീകളും കുട്ടികളും ഉൾപ്പെടെ ഡസൻ കണക്കിന് ആളുകളെ കൊല്ലുകയും പരിക്കേൽപ്പിക്കുകയും ചെയ്തു,” – അഫ്ഗാൻ സർക്കാരിന്റെ വക്താവ് സബിഹുള്ള മുജാഹിദ് ഒരു സോഷ്യൽ മീഡിയ പ്ലാറ്റ്ഫോമിലെ ഒരു പോസ്റ്റിൽ പറഞ്ഞു.
