ഫിറ്റ്നസ് കാത്തുസൂക്ഷിക്കുന്ന ബോളിവുഡ് താരങ്ങളിൽ പ്രധാനിയാണ് ഹൃത്വിക് റോഷൻ. വൈറലും ട്രെൻഡിങ്ങുമാകുന്ന ഫാസ്റ്റിങ് രീതികൾ പിന്തുടരുന്നതിന് പകരം താരം തിരഞ്ഞെടുക്കുന്നത് ചിട്ടയായി ക്രമീകരിച്ച ഡയറ്റ് പ്ലാനാണെന്ന് പറയുകയാണ് അദ്ദേഹത്തിന്റെ പേഴ്സണൽ ഷെഫായ ശുഭം വിശ്വകർമ.
ശുഭം ഒരു അഭിമുഖത്തിലാണ് ഇക്കാര്യങ്ങൾ പങ്കുവെച്ചത്. അദ്ദേഹം ഓരോ 2.5 മുതൽ 3 മണിക്കൂർ കൂടുമ്പോഴും ഭക്ഷണം കഴിക്കുകയും രാത്രി 9 മണിയോടെ ഭക്ഷണം കഴിക്കുന്നത് അവസാനിപ്പിക്കുകയും ചെയ്യുമെന്ന് ശുഭം പറയുന്നു. പ്രോട്ടീൻ, കാർബോഹൈഡ്രേറ്റ്, നാരുകൾ, ആരോഗ്യകരമായ കൊഴുപ്പുകൾ എന്നിവ കൃത്യമായി സന്തുലനം ചെയ്തതാണ് അദ്ദേഹത്തിന്റെ ഡയറ്റെന്നും ശുഭം പറയുന്നു.
മുട്ട, മത്സ്യം, പയർവർഗ്ഗങ്ങൾ, ക്വിനോവ, ഗ്രീക്ക് യോഗർട്ട്, നട്സ്, വിത്തുകൾ തുടങ്ങിയ ഭക്ഷണങ്ങൾ ഉൾപ്പെട്ടതാണ് ഡയറ്റ്. പഞ്ചസാര, ഗ്ലൂട്ടൻ, സീഡ് ഓയിലുകൾ, കൂൺ എന്നിവ ഒഴിവാക്കുമ്പോഴും ബ്രൗണി അദ്ദേഹം ആസ്വദിക്കാറുണ്ടെന്നും ശുഭം പറയുന്നുണ്ട്.
ഹൃത്വിക്കിന്റെ ഫിറ്റ്നസ് പാരമ്പര്യമായി ലഭിച്ചതാണെന്ന് പലരും കരുതുന്നുണ്ടെങ്കിലും ചിട്ടയായ വ്യായാമങ്ങൾ, ഭക്ഷണക്രമം എന്നിവ വർഷങ്ങളായി പിന്തുടരുന്നുണ്ടെന്നതും ശ്രദ്ധേയമാണ്.
ഇന്റർമിറ്റന്റ് ഫാസ്റ്റിങ് പിന്തുടരുന്ന പല സെലിബ്രിറ്റികളിൽ നിന്നും വ്യത്യസ്തമായി, ഹൃത്വിക് റോഷൻ ദിവസം മുഴുവൻ ചെറിയ അളവിൽ ഭക്ഷണം കഴിക്കുന്നു.
ഉയർന്ന പ്രോട്ടീനുള്ള, ഗ്ലൂറ്റൻ കുറഞ്ഞ ബ്രൗണി ഹൃത്വിക് ആസ്വദിക്കുന്നുണ്ടെന്നും ഷെഫ് പറഞ്ഞു. ഇത് ഫിറ്റ്നസ് ലക്ഷ്യങ്ങളിൽ വിട്ടുവീഴ്ച ചെയ്യാതെ തന്നെ മധുരത്തോടുള്ള കൊതിയെ തൃപ്തിപ്പെടുത്താൻ അദ്ദേഹത്തെ സാഹായിക്കുന്നു.
കർശനമായ ചിട്ടകൾക്കിടയിലും ഇടയ്ക്കിടെ തിരഞ്ഞെടുത്ത ചീറ്റ് മീലും അദ്ദേഹം കഴിക്കാറുണ്ട്. തന്തൂരി ചിക്കൻ, ബാർബിക്യൂ ചിക്കൻ, നോ-കാർബ് ബർഗർ, ജോവർ (മണിച്ചോളം) ഉപയോഗിച്ചുള്ള പിസ്സ എന്നിവയാണ് അദ്ദേഹത്തിന്റെ ഇഷ്ട വിഭവങ്ങൾ. പോഷകാഹാരത്തിൽ ശ്രദ്ധ കേന്ദ്രീകരിക്കുന്നതിനൊപ്പം ഇഷ്ടവിഭവങ്ങൾ ആസ്വദിക്കാനും താരം മറക്കാറില്ല.
