അയിരൂര് (തിരുവല്ല): അമ്മയ്ക്ക് പ്രഥമ സ്ഥാനം നല്കുന്നതാണ് ഭാരതീയ പാരമ്പര്യമെന്ന് കന്യാകുമാരി വിവേകാനന്ദ കേന്ദ്രം പ്രാന്ത സംഘാടക ബി. രാധാദേവി. ഹിന്ദുമത മഹാമണ്ഡലത്തിന്റെ ആഭിമുഖ്യത്തില് അയിരൂര് പമ്പാ മണല്പുറത്ത് വിദ്യാധിരാജ നഗറില് ഹിന്ദുമത പരിഷത്തിന്റെ ഏഴാം ദിവസം സംഘടിപ്പിച്ച വനിതാ സമ്മേളനം ഉദ്ഘാടനം ചെയ്യുകയായിരുന്നു.
മാതൃദേവോ ഭവ എന്ന് പഠിപ്പിക്കുന്ന ഭാരതീയ സങ്കല്പ്പത്തില് ആദ്യ ദൈവം അമ്മയാണ്. അമ്മയിലൂടെയാണ് നാം ദൈവത്തെ അനുഭവിച്ചറിയുന്നത്. ജന്മം നല്കിയവര് ജനനി
ആകുമ്പോള് സഹനവും ക്ഷമയും ത്യാഗവുമെല്ലാം അവര്ക്ക് ജീവിതത്തില് ഉണ്ടാവുന്നു. കുടുംബങ്ങളെ ചൈതന്യമുള്ളതാക്കാന് സ്ത്രീകളില് മാതൃത്വം ഉണരേണ്ടതുണ്ട് എന്നും രാധാദേവി അഭിപ്രായപ്പെട്ടു. കോട്ടയം ബാറിലെ അഭിഭാഷകയായ സിന്ധു ഗോപാലകൃഷ്ണന് ‘ഞാനൊരു അമ്മയാണോ’ എന്ന വിഷയത്തിലും ‘കുടുംബ ചൈതന്യം കര്മരംഗത്തെ വിജയം’ എന്ന വിഷയത്തില് ശ്രുതി ശ്യാമും പ്രഭാഷണം നടത്തി.
എംജി സര്വകലാശാലയില് നിന്ന് ഇംഗ്ലീഷ് സാഹിത്യത്തില് പിഎച്ച്ഡി നേടിയ ചങ്ങനാശ്ശേരി എന്എസ്എസ് ഹിന്ദു കോളജ് അദ്ധ്യാപിക ഡോ. പാര്വ്വതി മോഹന്, എംഎ എക്കണോമിക്സ് റാങ്ക് ജേതാവായ ആരതി എസ്. നായര് എന്നിവരെ ചടങ്ങില് ആദരിച്ചു. ഹിന്ദുമത മഹാമണ്ഡലം വൈസ് പ്രസിഡന്റ് മാലേത്ത് സരളാദേവി അധ്യക്ഷയായി. പത്തനംതിട്ട ഡെ. കളക്ടര് ആര്. രാജലഷ്മി, ഹിന്ദുമത മഹാമണ്ഡലം എക്സി. കമ്മിറ്റി അംഗം രമാ മോഹന്, ഓമനാ രാധാകൃഷ്ണന് എന്നിവര് സംസാരിച്ചു.
