ന്യൂദല്ഹി: പാകിസ്ഥാന് ഭീകരസംഘടനയായ ലഷ്കര് ഇ തൊയ്ബ രാജ്യതലസ്ഥാനത്ത് സ്ഫോടനം നടത്താന് ലക്ഷ്യമിടുന്നതായി രഹസ്യാന്വേഷണ ഏജന്സികളുടെ മുന്നറിയിപ്പ്. ദല്ഹിയിലെ ചെങ്കോട്ട, ചാന്ദ്നി ചൗക്കിലെ ക്ഷേത്രങ്ങള് എന്നിവയുള്പ്പെടെയുള്ള പ്രധാന ഇടങ്ങളില് ഐഇഡി ഉപയോഗിച്ച് സ്ഫോടനം നടത്താനാണ് ഭീകരര് ലക്ഷ്യമിടുന്നത്.
ഫെബ്രുവരി 6ന് ഇസ്ലാമബാദിലെ പള്ളിയിലുണ്ടായ സ്ഫോടനത്തിന് പകരമായാണ് ഭാരതത്തില് ആക്രമണം നടത്താന് ലഷ്കര് ഇ തൊയ്ബ തയാറെടുക്കുന്നതത്രെ. 31 പേരാണ് അന്ന് സ്ഫോടനത്തില് കൊല്ലപ്പെട്ടത്. ഇതിന്റെ ഉത്തരവാദിത്തം ഐഎസ് ഏറ്റെടുത്തിരുന്നെങ്കിലും ഭാരതത്തില് ആക്രമണം നടത്തി തിരിച്ചടിക്കാനാണ് ഭീകരരുടെ നീക്കം.
കഴിഞ്ഞ വര്ഷം നവംബറില് ചെങ്കോട്ടയ്ക്ക് സമീപമുണ്ടായ സ്ഫോടനത്തില് 12 പേര് കൊല്ലപ്പെട്ടിരുന്നു. ഇതിന്റെ പശ്ചാത്തലത്തിലാണ് വീണ്ടുമുള്ള ആക്രമണ ഭീഷണി. അന്ന് അറസ്റ്റിലായ ഭീകരരില് നിന്ന് ലഭിച്ച വിവരങ്ങളുടെ അടിസ്ഥാനത്തില് എന്ഐഎ അന്വേഷണം ഊര്ജ്ജിതമാക്കി.
ഭീഷണിയുടെ പശ്ചാത്തലത്തില് ദല്ഹിയിലും പരിസര പ്രദേശങ്ങളിലും സുരക്ഷാ ഏജന്സികള് നിരീക്ഷണം കര്ശനമാക്കി. മെട്രോസ്റ്റേഷനുകള്, ചന്തകള്, ആരാധനാലയങ്ങള് എന്നിവിടങ്ങളില് കൂടുതല് സേനയെ വിന്യസിച്ചു. സംശയാസ്പദമായ സാഹചര്യത്തില് ആരെയെങ്കിലും കണ്ടാല് ഉടന് പോലീസിനെ അറിയിക്കാന് പൊതുജനങ്ങള്ക്ക് നിര്ദേശം നല്കി.
