ചെറുകോല്പ്പുഴ(തിരുവല്ല): ഭാരതീയ സംസ്കൃതിയില് അലിഞ്ഞുചേര്ന്ന ധര്മത്തെ പരിരക്ഷിക്കുന്നത് ഋഷീശ്വര പരമ്പരകളാണെന്ന് മഹാമണ്ഡലേശ്വര് സ്വാമി ആനന്ദവനം ഭാരതി. സനാതന ധര്മ പ്രചാരണാര്ത്ഥം അയിരൂര് ചെറുകോല്പ്പുഴ പമ്പ മണപ്പുറത്ത് ഹിന്ദുമത മഹാമണ്ഡലത്തിന്റെ നേതൃത്വത്തില് നടക്കുന്ന 114ാമത് ഹിന്ദുമത കണ്വെന്ഷന് ഉദ്ഘാടനം ചെയ്യുകയായിരുന്നു സ്വാമിജി.
അധിനിവേശ കാലഘട്ടത്തില് നമുക്കുണ്ടായ മൂല്യച്യുതിയുടെ പാദമുദ്രകള് ധര്മത്തിന്റെ പാതയിലൂടെ ഗതകാല പ്രൗഢിയിലേക്ക് തിരിച്ചു കൊണ്ടുവരാന് ഋഷീശ്വരന്മാര് ഭഗീരഥ പ്രയത്നം നടത്തിയിട്ടുണ്ട്. നവോത്ഥാന നായകന്മാരായ ചട്ടമ്പിസ്വാമികളും ശ്രീനാരായണഗുരുവും പണ്ഡിറ്റ് കറുപ്പനും ഉള്പ്പെടുന്നവരാണ് നമുക്ക് വഴികാട്ടികളായത്. ഹിന്ദു സംസ്കൃതിയെ വീണ്ടെടുത്ത് ഭാരതം ഇന്ന് വിശ്വഗുരു സ്ഥാനത്തേക്ക് ഉയര്ന്നുകൊണ്ടിരിക്കുകയാണ്. സിന്ധുവും ഗംഗയും സരസ്വതിയും ഭാരതപ്പുഴയും പമ്പയും അടങ്ങുന്ന തീര്ത്ഥങ്ങള് എല്ലാം നമ്മുടെ ശരീരത്തിലെ പ്രാണന് പോലെ പരിരക്ഷിക്കണമെന്നും സ്വാമിജി പറഞ്ഞു.
ഹിന്ദുമത മഹാമണ്ഡലം പ്രസിഡന്റ് പി.എസ്. നായര് അധ്യക്ഷനായി. വാഴൂര് തീര്ത്ഥപാദാശ്രമം മഠാധിപതി സ്വാമി ശ്രീമത് പ്രജ്ഞാനാനന്ദ തീര്ത്ഥപാദ അനുഗ്രഹ പ്രഭാഷണം നടത്തി.
റിട്ട. പ്രൊഫ. പൂജപ്പുര കൃഷ്ണന് നായര് മുഖ്യപ്രഭാഷണം നടത്തി. ആന്റോ ആന്റണി എം.പി, അഡ്വ. പ്രമോദ് നാരായന് എംഎല്എ, അയിരൂര് ഗ്രാമപഞ്ചായത്ത് പ്രസിഡന്റ് സുരേഷ് കുഴിവേലില്, ചെറുകോല്പ്പുഴ ഗ്രാമപഞ്ചായത്ത് പ്രസിഡന്റ് അജീന നജീബ്, ഹിന്ദുമത മഹാമണ്ഡലം ട്രഷറര് സോമനാഥന് നായര്, ജനറല് സെക്രട്ടറി എ.ആര്. വിക്രമന് പിള്ള എന്നിവര് സംസാരിച്ചു.
