സംസ്ഥാന സര്‍ക്കാരിന്റെ അവഗണന; പിണറായി ഭരണം പട്ടികജാതി ജനതയെ തകര്‍ത്തു, സംസ്ഥാന വ്യാപക പ്രക്ഷോഭത്തിന് പട്ടികജാതി മോര്‍ച്ച

തൃശൂര്‍: സംസ്ഥാന സര്‍ക്കാരിന്റെ പട്ടികജാതി ജനവിഭാഗങ്ങളോടുള്ള വഞ്ചനയ്‌ക്കും അവഗണനയ്‌ക്കുമെതിരെ സംസ്ഥാന വ്യാപകമായി പ്രക്ഷോഭം സംഘടിപ്പിക്കുമെന്ന് പട്ടികജാതി മോര്‍ച്ച സംസ്ഥാന പ്രസിഡന്റ് ഷാജുമോന്‍ വട്ടേക്കാട് പറഞ്ഞു. ഫെബ്രു. 16, 17, 18 തിയതികളില്‍ കളക്ട്രേറ്റ് മാര്‍ച്ചും ധര്‍ണയും സംഘടിപ്പിക്കും.

പത്ത് വര്‍ഷത്തെ പിണറായി സര്‍ക്കാരിന്റെ ഭരണം പട്ടികജാതി ജനതയെ തകര്‍ത്തു. പട്ടികജാതി പദ്ധതികള്‍ പൂര്‍ണമായും സ്തംഭനാവസ്ഥയിലാണ്. കേന്ദ്രസര്‍ക്കാര്‍ പട്ടികജാതി ക്ഷേമത്തിന് നല്‍കുന്ന ഫണ്ടും പദ്ധതികളും വകമാറ്റുകയാണ്. തെരഞ്ഞെടുപ്പ് പ്രഖ്യാപനത്തിന് മുമ്പ് പട്ടികജാതി പദ്ധതികളുടെ മുഴുവന്‍ കുടിശികയും വിതരണം ചെയ്യാന്‍ സര്‍ക്കാര്‍ തയാറാവണം. തെരഞ്ഞെടുപ്പ് മുന്നില്‍ക്കണ്ട് സംസ്ഥാനത്ത് വ്യാപകമായി പദ്ധതികള്‍ പ്രഖ്യാപിക്കുന്ന പിണറായി സര്‍ക്കാര്‍ പട്ടികജാതി വിഭാഗത്തിന്റെ മുഴുവന്‍ പദ്ധതികള്‍ക്കും ആവശ്യമായ പണം അനുവദിക്കണമെന്ന് ആവശ്യപ്പെട്ട് 14 പട്ടികജാതി എംഎല്‍എമാരുടെ ഓഫീസിലേക്കും വകുപ്പ് മന്ത്രി കേളുവിന്റെ വസതിയിലേക്കും ഫെബ്രുവരി 25, 26 തിയതികളില്‍ പട്ടികജാതി മോര്‍ച്ച മാര്‍ച്ച് സംഘടിപ്പിക്കും.

പട്ടികജാതി വിദ്യാര്‍ത്ഥികളുടെ പോസ്റ്റ്‌മെട്രിക് സ്‌കോളര്‍ഷിപ്പ് 9,42,74,000 രൂപ വിതരണം ചെയ്യാനുണ്ട്. പട്ടികജാതി വികസന വകുപ്പിന്റെ ചികിത്സാ സഹായം 34 കോടി 22 ലക്ഷം രൂപയും പട്ടികജാതി വനിതകളുടെ വിവാഹധനസഹായമായി 58 കോടി 70 ലക്ഷം രൂപയും മിശ്രവിവാഹിതര്‍ക്കുള്ള ധനസഹായം 65 കോടി 12 ലക്ഷം രൂപയും പട്ടികജാതി യുവാക്കള്‍ക്ക് വിദേശത്ത് ജോലിക്കുള്ള ധനസഹായം 56 കോടി രൂപയും ഏകവരുമാനദായകര്‍ മരിച്ചാല്‍ സഹായം നല്‍കുന്ന പദ്ധതിക്ക് 15 കോടി രൂപയും സര്‍ക്കാര്‍ അനുവദിച്ചാല്‍ കുടിശ്ശികകള്‍ വിതരണം ചെയ്യാന്‍ സാധിക്കും. ഈ പദ്ധതികള്‍ക്ക് നല്‍കുന്നതിനായി 240 കോടി രൂപ അനുവദിക്കാന്‍ സര്‍ക്കാര്‍ തയാറാവണം.

പട്ടികജാതി വിഭാഗങ്ങളുടെ ആനുകൂല്യങ്ങളും പദ്ധതികളും മാത്രമാണ് സംസ്ഥാനത്ത് സ്തംഭനാവസ്ഥയിലുള്ളത്. മതന്യൂനപക്ഷങ്ങള്‍ക്ക് സര്‍ക്കാര്‍ പ്രഖ്യാപിച്ച ആനുകൂല്യങ്ങള്‍ കുടിശിക വരുത്താതെ സര്‍ക്കാര്‍ വിതരണം ചെയ്യുമ്പോള്‍ പട്ടികജാതി വിഭാഗങ്ങള്‍ക്ക് മാത്രം വിതരണം ചെയ്യാത്തത് ചിറ്റമ്മനയമാണ്. പട്ടികജാതി വകുപ്പ് മന്ത്രിയും സംവരണ സീറ്റില്‍ വിജയിച്ചുവന്ന 14 പട്ടികജാതി എംഎല്‍എമാരും നിയമസഭയ്‌ക്ക് അകത്തുംപുറത്തും പട്ടികജാതി സമൂഹത്തിന്റെ അവകാശങ്ങള്‍ സംരക്ഷിക്കാന്‍ ശ്രമിക്കുന്നില്ല.

സര്‍ക്കാരില്‍ സമ്മര്‍ദം ചെലുത്തി പട്ടികജാതി വിഭാഗങ്ങള്‍ക്ക് ആനുകൂല്യങ്ങള്‍ വാങ്ങിക്കൊടുക്കാന്‍ പട്ടികജാതി എംഎല്‍എമാരും വകുപ്പ് മന്ത്രിയും തയാറാകണമെന്ന് ഷാജുമോന്‍ വട്ടേക്കാട് ആവശ്യപ്പെട്ടു. പട്ടികജാതി മോര്‍ച്ച സിറ്റി ജില്ലാ പ്രസിഡന്റ് മനോജ് നെല്ലിക്കാട്, ജനറല്‍ സെക്രട്ടറി അമിതാഭ് എന്നിവരും വാര്‍ത്താസമ്മേളനത്തില്‍ പങ്കെടുത്തു.