കൊച്ചി :പ്രമുഖര്ക്കെതിരെ ആരോപണം ഉയരുമ്പോള് പരാതിക്കാരെ നിശബ്ദരാക്കാന് ശ്രമം നടക്കുന്നുവെന്ന് സംസ്ഥാന വനിതാ കമ്മിഷന് അധ്യക്ഷ പി.സതീദേവി.സംവിധായകനും ഇടത് മുന് എംഎല്എയുമായ പി.ടി. കുഞ്ഞുമുഹമ്മദിനെതിരെ ചലചിത്ര പ്രവര്ത്തക ആശ ആച്ചി ജോസഫ് തുറന്നെഴുതിയതിനെ സ്വാഗതം ചെയ്യുന്നുവെന്നും അവര് പറഞ്ഞു.
മുഖ്യമന്ത്രിക്ക് നല്കിയ പരാതി ആശ ആച്ചി വനിതാ കമ്മിഷനും നല്കിയിരുന്നു.ഇക്കാര്യം മുഖ്യമന്ത്രിയുടെ ഓഫിസിനെ അറിയിച്ചിരുന്നുവെന്നും പി.സതീദേവി പറഞ്ഞു.
ലൈംഗികാതിക്രമം നേരിട്ടതിനെക്കുറിച്ച് പരാതി നല്കി ഏറെ ദിവസങ്ങള് കഴിഞ്ഞാണ് പൊലീസ് എഫ്ഐആര് ഇടാന് പോലും തയാറായത് എന്ന് ഒരു ദിനപ്രത്രത്തില് എഴുതിയ ലേഖനത്തില് ആശ ആച്ചി ചൂണ്ടിക്കാട്ടിയിരുന്നു. ഇക്കാര്യത്തില് പ്രതികരിക്കുകയായിരുന്നു സതീദേവി.
മുഖ്യമന്ത്രിക്ക് നല്കിയ പരാതിയുടെ പകര്പ്പാണ് വനിതാ കമ്മീഷനും നല്കിയത്. പരാതി ലഭിച്ച കാര്യം മുഖ്യമന്ത്രിയുടെ ഓഫിസിന്റെ ശ്രദ്ധയില്പ്പെടുത്തിയപ്പോഴാണ് മുഖ്യമന്ത്രിയുടെ ഓഫിസില് നിന്ന് ബന്ധപ്പെട്ട പൊലീസ് സ്റ്റേഷനിലേക്ക് പരാതി അയച്ചു കൊടുത്തത്.ആരോപണവിധേയനായ വ്യക്തി ഉന്നതസ്ഥാനീയനായിട്ടു പോലും അറസ്റ്റ് അടക്കം നടപടി ഉണ്ടായെന്നും സതീദേവി പറഞ്ഞു.
എന്നാല് പ്രമുഖരായ വ്യക്തികള്ക്കെതിരെ ആക്ഷേപങ്ങളും പരാതികളും ഉണ്ടാകുമ്പോള് പൊതുസമൂഹത്തില് നിന്നുണ്ടാകുന്ന സമ്മര്ദ്ദം ഈ കേസിലും ഉണ്ടായിട്ടുണ്ട് എന്ന് പി സതീദേവി പറഞ്ഞു. ആരോപണവിധേയരായവര് ഉന്നത സ്ഥാനത്ത് ഇരിക്കുമ്പോള് പരാതിക്കാരെ നിശബ്ദരാക്കാന് ശ്രമമുണ്ടാകാറുണ്ട്.സ്ത്രീകള് പരാതിപ്പെടുന്നതിനുള്ള സാഹചര്യം തന്നെ പലപ്പോഴും ഒഴിവാക്കാനുള്ള ശ്രമം സമൂഹത്തിന്റെ വിവിധ കോണുകളില് നിന്ന് ഉയര്ന്നു വരാറുണ്ടെന്നും അവര് പറഞ്ഞു.
