ഞങ്ങൾ മുസ്ലീങ്ങൾ അള്ളാഹുവിനെ മാത്രമേ ആരാധിക്കുന്നുള്ളൂ ; ആരെയും അള്ളാഹുവുമായി ചേർത്ത് പറയുന്നത് പോലും ഞങ്ങൾ അംഗീകരിക്കില്ല : അർഷാദ് മദനി

ന്യൂഡൽഹി : കഴിഞ്ഞ ദിവസമാണ് കേന്ദ്രസർക്കാർ വന്ദേമാതരം സംബന്ധിച്ച മാർഗ്ഗനിർദ്ദേശങ്ങൾ പുറപ്പെടുവിച്ചത് . പുതിയ നിർദ്ദേശങ്ങൾ അനുസരിച്ച്, സർക്കാർ പരിപാടികളിലും സ്കൂളുകളിലും മറ്റ് പ്രധാന പരിപാടികളിലും വന്ദേമാതരം ആലപിക്കുന്നത് നിർബന്ധമാക്കി. മാത്രമല്ല ദേശീയഗാനമായ ജന ഗണ ആലപിക്കുമ്പോൾ നൽകുന്ന അതേ ബഹുമാനം വന്ദേമാതരത്തിനും നൽകണമെന്നും നിർദേശമുണ്ട്.

എന്നാൽ വന്ദേമാതരം നിർബന്ധിതമായി അടിച്ചേൽപ്പിക്കാനുള്ള ഈ തീരുമാനം ഭരണഘടന ഉറപ്പുനൽകുന്ന മതസ്വാതന്ത്ര്യത്തിനു നേരെയുള്ള നഗ്നമായ ആക്രമണമാണെന്ന് ജാമിയത്ത് ഉലമ-ഇ-ഹിന്ദ് പ്രസിഡന്റ് അർഷാദ് മദനി പറയുന്നു.ന്യൂനപക്ഷങ്ങളുടെ അവകാശങ്ങൾ കവർന്നെടുക്കാനുള്ള അപലപനീയമായ ശ്രമമാണിതെന്നും മദനി എക്സിൽ കുറിച്ചു.

‘ വന്ദേമാതരം ചൊല്ലുന്നതില്‍ നിന്നോ അതിന്റെ സംഗീതം വായിക്കുന്നതില്‍ നിന്നോ മുസ്ലീങ്ങള്‍ ആരെയും തടയാറില്ലെന്നും, മറിച്ച് അതിലെ ചില വരികള്‍ ബഹുദൈവ വിശ്വാസത്തില്‍ അധിഷ്ഠിതമായതിനാലും മാതൃരാജ്യത്തെ ദൈവമായി അവതരിപ്പിക്കുന്നതിനാലും ഏകദൈവ മതവിശ്വാസികളായ തങ്ങൾക്ക് ഇത് ബുദ്ധിമുട്ടുണ്ടാക്കും. അല്ലാഹുവിനെ മാത്രം ആരാധിക്കുന്ന ഒരു മുസ്ലീമിനെ അത് ചൊല്ലാന്‍ നിര്‍ബന്ധിക്കുന്നത് ഭരണഘടനയുടെ ആര്‍ട്ടിക്കിള്‍ 25 ന്റെയും സുപ്രീം കോടതിയുടെ തീരുമാനങ്ങളുടെയും നഗ്നമായ ലംഘനമാണെന്നും ‘ മദനി പറഞ്ഞു.

‘ ഞങ്ങൾ മുസ്ലീങ്ങൾ അല്ലാഹുവിനെ മാത്രമേ ആരാധിക്കുന്നുള്ളൂ.ഈ ഗാനം നിർബന്ധമാക്കുകയും പൗരന്മാരുടെ മേൽ അടിച്ചേൽപ്പിക്കാൻ ശ്രമിക്കുകയും ചെയ്യുന്നത് ദേശസ്നേഹമല്ല , മറിച്ച് തിരഞ്ഞെടുപ്പ് രാഷ്‌ട്രീയവും, ഒരു വർഗീയ അജണ്ടയും, കാതലായ വിഷയങ്ങളിൽ നിന്ന് പൊതുജനശ്രദ്ധ തിരിച്ചുവിടാനുള്ള മനഃപൂർവമായ തന്ത്രവുമാണ്. മാതൃരാജ്യത്തോടുള്ള സ്നേഹം മുദ്രാവാക്യങ്ങളെ അടിസ്ഥാനമാക്കിയുള്ളതല്ല, മറിച്ച് സ്വഭാവത്തെയും ത്യാഗത്തെയും അടിസ്ഥാനമാക്കിയുള്ളതാണ്, മുസ്ലീങ്ങളുടെയും ജംഇയ്യത്ത് ഉലമ-ഇ-ഹിന്ദിന്റെയും അഭൂതപൂർവമായ പോരാട്ടം ഇതിന്റെ തിളക്കമാർന്ന ഉദാഹരണമാണ്. ഇത്തരം തീരുമാനങ്ങൾ രാജ്യത്തിന്റെ സമാധാനം, ഐക്യം, ജനാധിപത്യ മൂല്യങ്ങൾ എന്നിവയെ ദുർബലപ്പെടുത്തുക മാത്രമല്ല, ഭരണഘടനയെ ലംഘിക്കുകയും ചെയ്യുന്നു.

“ഓർക്കുക! മുസ്ലീങ്ങൾ ഏക അല്ലാഹുവിനെ മാത്രമേ ആരാധിക്കുന്നുള്ളൂ. നമുക്ക് എല്ലാം സഹിക്കാൻ കഴിയും, പക്ഷേ ആരെയും അല്ലാഹുവുമായി പങ്കുചേർക്കുന്നത് ഒരിക്കലും അംഗീകരിക്കാൻ കഴിയില്ല. അതിനാൽ, വന്ദേമാതരം നിർബന്ധമാക്കുന്നത് ഭരണഘടനയുടെയും മതസ്വാതന്ത്ര്യത്തിന്റെയും ജനാധിപത്യ മൂല്യങ്ങളുടെയും നേരെയുള്ള നഗ്നമായ ആക്രമണമാണ്,” മദനി പറഞ്ഞു.