മുംബൈ: മഹാരാഷ്ട്രയിലെ ആദ്യ വനിതാ ഉപമുഖ്യമന്ത്രിയായി സത്യപ്രതിജ്ഞ ചെയ്ത് സുനേത്ര പവാര് ഔദ്യോഗികമായി ചുമതലയേറ്റു. എന്സിപി അജിത് പവാര് വിഭാഗത്തെ എന്സിപി ശരത് പവാര് ഗ്രൂപ്പുമായി ലയിപ്പിച്ച ശേഷം ബിജെപി നേതൃത്വത്തിലുള്ള മഹായുതി സര്ക്കാരില് അജിത് പവാറിന്റെ പാര്ട്ടിയ്ക്കുള്ള മന്ത്രിസ്ഥാനങ്ങളും പദവികളും കയ്യടക്കാനുള്ള ശരത് പവാറിന്റെ ഗൂഢപദ്ധതി ഇതോടെ പൊളിഞ്ഞു.
ഭര്ത്താവ് അജിത് പവാറിന്റെ പൈതൃകം കാത്തുസൂക്ഷിക്കുമെന്ന് സുനേത്ര പവാര് പറഞ്ഞു. ഈ വാചകത്തില് എല്ലാം ഒളിഞ്ഞുകിടപ്പുണ്ട്. ഭര്ത്താവ് എന്തിനാണോ ബിജെപിയ്ക്കൊപ്പം പോയത് അതേ പാതയില് താനും സഞ്ചരിക്കുമെന്ന സൂചന തന്നെയാണ സുനേത്ര പവാര് നല്കിയത്. മാത്രമല്ല പാര്ട്ടിയിലെ അധികാരമോഹികളായ സീനിയര് നേതാക്കളെ നിഷ്പ്രഭയാക്കിയാണ് അസാധാരണ ഊര്ജ്ജത്തോടെ സുനേത്ര ഭര്തൃവിയോഗത്തിന്റെ ദുഖാന്തരീക്ഷത്തിലും പ്രവര്ത്തിച്ചത്. അജിത് പവാര് എന്ന വലിയ നേതാവിന്റെ വിടവ് നികത്താനാണ് സുനേത്ര പവാര് ശ്രമിക്കുന്നത്. അജിത് പവാര് മരിച്ച ഉടനെ മുഖ്യമന്ത്രി ദേവേന്ദ്ര ഫഡ്നാവിസും ഏക് നാഥ് ഷിന്ഡേയും സുനേത്ര പവാറിനെ കണ്ടിരുന്നു. ഇവര് മൂവരും ചേര്ന്നുള്ള സൗഹൃദമായ മഹാവികാസ് അഘാഡി സര്ക്കാരിനെ മുന്നോട്ട് കൊണ്ടുപോയിരുന്നത്. അതേ രീതിയില് താനും മുന്നോട്ട് പോകുമെന്ന സൂചന തന്നെയാണ് സുനേത്ര പവാര് നല്കുന്നത്.
ഭര്ത്താവ് അജിത് പവാര് മരിച്ചതിന്റെ മൂന്നാം നാള് തന്നെ ഉപമുഖ്യമന്ത്രിയായി സത്യപ്രതിജ്ഞ ചെയ്യാന് സുനേത്ര പവാര് പോവുകയായിരുന്നു. ഭര്ത്താവിന്റെ പാര്ട്ടിയെ ലയനത്തിലൂടെ കൈക്കുമ്പിളിലൊതുക്കാനുള്ള നീക്കം ശരത് പവാറിനുണ്ടെന്ന് എന്സിപി അജിത് പവാറിലെ തന്നെ സീനിയര് നേതാക്കള് ഭയപ്പെട്ടിരുന്നു. ഇതാണ് ഭര്ത്താവ് മരിച്ചതിന്റെ മൂന്നാം നാള് തന്നെ സുനേത്ര പവാര് സത്യപ്രതിജ്ഞ ചെയ്യാന് കാരണമായത്. എന്നാല് സത്യപ്രതിജ്ഞ ചെയ്യാന് പോകുന്നതിന് മുന്പ് തന്നെ അറിയിച്ചില്ലെന്ന് ശരത് പവാര് ഈര്ഷ്യ പ്രകടിപ്പിച്ചിരുന്നു. വൈകാതെ ശരത് പവാര് ഗുരുതരമായ രോഗബാധയുമായി ആശുപത്രിയില് ആയിരിക്കുകയാണ്.
പ്രഫുല്പട്ടേല്, ഛഗന് ഭൂജ് ബല്, സുനില് തത്കരെ എന്നിവര്ക്കും ശരത് പവാര് ഗ്രൂപ്പുമായി അജിത് പവാര് ഗ്രൂപ്പിനെ ലയിപ്പിക്കുന്നതില് താല്പര്യമില്ലെന്നറിയുന്നു. അങ്ങിനെ സംഭവിച്ചാല് അധികാരം മുഴുവന് ശരത് പവാര് കയ്യടക്കുമെന്നാണ് അവര് ഭയക്കുന്നത്. ശരത് പവാറിനൊപ്പം നിഴലുപോലെ പ്രവര്ത്തിച്ച സീനിയര് നേതാവും സ്വന്തം മരുമകനുമായ അജിത് പവാറിനെ തഴഞ്ഞ് പാര്ട്ടിയുടെ നേതൃസ്ഥാനം മകള് സുപ്രിയ സുലെയ്ക്ക് നല്കിയതിന്റെ വേദന കൂടിയാണ് ബിജെപിയ്ക്കൊപ്പം ചേരാന് അജിത് പവാറിനെ പ്രേരിപ്പിച്ചത്.
സിദ്ധിവിനായകക്ഷേത്രത്തിലും ചൈത്യഭൂമിയിലും ദര്ശനം നടത്തിയതിന് ശേഷമാണ് അധികാരമേറ്റത്. എക്സൈസ്, കായികം, ന്യൂനപക്ഷവികസനം തുടങ്ങിയ വകുപ്പുകളാണ് അവര്ക്ക് നല്കിയിരിക്കുന്നത്. സത്യപ്രതിജ്ഞയ്ക്കായി മന്ത്രാലയത്തിലേക്ക് പുറപ്പെടും മുന്പ് മകന് പാര്ത്ഥ പവാറിനൊപ്പം സുനേന്ത്ര പവാര് എന്സിപി ഓഫീസില് എത്തി സീനിയര്നേതാക്കളെയും എംഎല്എമാരെയും കണ്ടു. അതിന് ശേഷം സത്യപ്രതിജ്ഞയ്ക്കായി പോകുമ്പോള് സീനിയര് നേതാക്കളായ പ്രഫുല് പട്ടേല്, ഛഗന്ഭുജ്ബല്, സുനില് തത്കരെ, ധനഞ്ജയ് മുണ്ഡെ എന്നിവര് അനുഗമിച്ചു.
