പിണറായി (കണ്ണൂര്): ശബരിമലയിലെ സ്വര്ണ്ണം കക്കാനും വില്ക്കാനും അന്വേഷണം അട്ടിമറിക്കാനും മുഖ്യമന്ത്രി പിണറായി വിജയനും പ്രതിപക്ഷ നേതാവ് വി.ഡി. സതീശനും ഒറ്റക്കെട്ടാണെന്ന് ബിജെപി സംസ്ഥാന ജനറല് സെക്രട്ടറി എം.ടി. രമേശ്. ശബരിമല സ്വര്ണ്ണക്കൊള്ളക്കേസില് മുഖ്യമന്ത്രി പിണറായി വിജയന് രാജിവെക്കണമെന്നാവശ്യപ്പെട്ട് ബിജെപി കണ്ണൂര് സൗത്ത് ജില്ലാ കമ്മറ്റിയുടെ നേതൃത്വത്തില് പിണറായിയിലെ മുഖ്യമന്ത്രിയുടെ ക്യാമ്പ് ഓഫീസിലേക്ക് നടത്തിയ പ്രതിഷേധ മാര്ച്ച് ഉദ്ഘാടനം ചെയ്യുകയായിരുന്നു അദ്ദേഹം.
കോണ്ഗ്രസും സിപിഎമ്മും ചേര്ന്ന് എസ്ഐടി അന്വേഷണത്തെ അട്ടിമറിക്കുകയാണ്. ആന്റോ ആന്റണിയും അടൂര് പ്രകാശും എന്തിനാണ് ഉണ്ണികൃഷ്ണന് പോറ്റിയെ സോണിയാ ഗാന്ധിക്ക് പരിചയപ്പെടുത്തിക്കൊടുത്തത്. പിണറായി വിജയനെപ്പാലെ തന്നെ സംശയത്തിന്റെ നിഴലിലാണ് സോണിയയും. ഉണ്ണികൃഷ്ണന് പോറ്റിക്ക് എന്ത് കാര്യമാണ് സോണിയയുടെ ഓഫീസില് കൈമാറേണ്ടത്. അന്വേഷണം മുന്നോട്ട് പോയാല് അന്വേഷണ ഏജന്സികള് മുഖ്യമന്ത്രിയുടെ ഓഫീസിലും സോണിയയുടെ ഓഫീസിലും കയറും. അത് തടയാനാണ് എസ്ഐടിയെ കൊല്ലാന് തീരുമാനിച്ചത്. സ്വര്ണക്കൊള്ളയില് പിണറായി വിജയനും വി.ഡി. സതീശനും ഒരേ നിറമാണ്. ശബരിമല സ്വര്ണക്കൊള്ളക്കേസ് അന്വേഷണം കൃത്യമാവണമെങ്കില് കേന്ദ്ര ഏജന്സി അന്വേഷിക്കണമെന്നാണ് ബിജെപി ആവശ്യപ്പെടുന്നത്. ശബരിമലയെ തകര്ക്കാന് സിപിഎം മുന്നിട്ടിറങ്ങിയപ്പോള് അതിന് കൂട്ടുനിന്നവരാണ് കോണ്ഗ്രസ്.
അന്വേഷണം മുന്നോട്ട് പോയപ്പോള് ഒരു പ്രത്യേക ഘട്ടത്തില് അട്ടിമറിക്കപ്പെട്ടു. അന്വേഷണം മുന്നോട്ട് പോകാന് പാടില്ലെന്നും എത്രയും വേഗം അവസാനിപ്പിക്കണമെന്നുമായിരുന്നു മുഖ്യമന്ത്രിയുടെ താല്പര്യം. പത്മകുമാറിനെ ചോദ്യം ചെയ്തതിന്റെ അടിസ്ഥാനത്തില് കടകംപള്ളി സുരേന്ദ്രനെ രണ്ട് തവണ ചോദ്യം ചെയ്തു. എന്നാല് അറസ്റ്റ് ചെയ്യാന് എസ്ഐടി തയ്യാറായില്ല. പോറ്റിയെ തനിക്ക് പരിചയപ്പെടുത്തിയത് കടകംപള്ളിയാണെന്ന് പത്മകുമാറിന്റെ മൊഴിയുണ്ട്. കൊള്ളയടിക്കുമ്പോള് കടകംപള്ളിയാണെങ്കില് കൊള്ളമുതല് വില്ക്കുമ്പോള് വാസവനാണ് മന്ത്രി. മുഖ്യമന്ത്രിയുടെ ഓഫീസിലും എത്തുമെന്ന ഘട്ടത്തിലാണ് അന്വേഷണത്തില് മുഖ്യമന്ത്രിയുടെ ഓഫീസ് ഇടപെട്ടത്. എന്തിനാണ് എസ്ഐടിയിലെ ഉദ്യോഗസ്ഥരെ മുഖ്യമന്ത്രിയുടെ ഓഫീസിലേക്ക് വിളിച്ച് വരുത്തിയതെന്ന് മുഖ്യമന്ത്രി വ്യക്തമാക്കണമെന്നും എം.ടി. രമേശ് ആവശ്യപ്പെട്ടു. കണ്ണൂര് സൗത്ത് ജില്ലാ പ്രസിഡന്റ് ബിജു എളക്കുഴി അധൃക്ഷത വഹിച്ചു. ജില്ലാ ജനറല് സെക്രട്ടറിമാരായ അഡ്വ. ഷിജിലാല് സ്വാഗതവും എം.ആര്. സുരേഷ് നന്ദിയും പറഞ്ഞു.
