കൊച്ചി: കേരള ജുഡീഷ്യല് സര്വീസ് പരീക്ഷയില് ആദ്യമായി, കാഴ്ച പരിമിതിയുള്ള സി. തന്യ നാഥന് വൈകല്യമുള്ള വ്യക്തികളുടെ മെറിറ്റ് പട്ടികയില് ഒന്നാമതെത്തി. പൂര്ണമായും അന്ധയായ താന്യയുടെ വിജയഗാഥ ശരിക്കും പ്രചോദനം നല്കുന്നതും ജീവിതത്തില് സമാനമായ പോരാട്ടങ്ങള് നേരിടുന്ന മറ്റുള്ളവര്ക്ക് പ്രതീക്ഷ നല്കുന്നതുമാണെന്ന് നീതിന്യായ സംവിധാനങ്ങള് വാഴ്ത്തുന്നു.കേരള ജുഡീഷ്യല് സര്വീസിലെ സിവില് ജഡ്ജിമാരുടെ (ജൂനിയര് ഡിവിഷന്) തിരഞ്ഞെടുപ്പിനായി നടത്തിയ 2025 ലെ പരിക്ഷയിലാണ് കണ്ണൂര് ജില്ലയില് നിന്നുള്ള തന്യയ്ക്ക് ഉന്നത വിജയം.
2024 ല് അഭിഭാഷകയായ 24 കാരിയായ തന്യ ഒന്നര വര്ഷമായി കണ്ണൂരില് പ്രാക്ടീസ് ചെയ്യുന്നു. യാതൊരു പരിശീലനവുമില്ലാതെയാണ് പരീക്ഷയ്ക്ക് തയ്യാറെടുത്തതെന്നും പ്രാഥമിക, പ്രധാന റൗണ്ടുകളില് സ്വയം പഠനം നടത്തിയെന്നും താന്യ ലൈവ് ലോ ഓണ്ലൈനു നല്കിയ അഭിമുഖത്തില് വ്യക്തമാക്കി.
നിലവില് കേരളത്തില് പേപ്പര്ലെസ് കോടതികള് പൂര്ണ്ണമായി നടപ്പിലാക്കിയിട്ടില്ലാത്തതിനാല്, കേസുകള് വാദിക്കാന് ബ്രെയില് ലിപിയില് കുറിപ്പുകള് തയ്യാറാക്കേണ്ടി വന്നുവെന്ന് അവര് അഭിമുഖത്തില് ചൂണ്ടിക്കാട്ടി. കോടതിമുറികളിലേക്ക് സാങ്കേതികവിദ്യ കൂടുതല് കാര്യക്ഷമമായി കൊണ്ടുവരാന് കഴിയുമെങ്കില് നല്ലതായിരിക്കുമെന്ന് അവര് പറയുന്നു.
