പത്തനംതിട്ട: ശബരിമല സ്വർണകൊള്ളയുമായി ബന്ധപ്പെട്ട് എസ് ഐ ടി വീണ്ടും ശബരിമലയിൽ പരിശോധന നടത്തും. ഇതിന് മുന്നോടിയായി ഈ മാസം 12 ന് പമ്പയിൽ അവലോകന യോഗം ചേരും. ലീഗൽ മെട്രോളജി അസെസ്മെൻ്റ് സംഘവും എസ് ഐ ടി സംഘത്തോടൊപ്പം ഉണ്ടായിരിക്കും. ശ്രീകോവിലിലെ എല്ലാ വശങ്ങളിലെയും സ്വർണം സംഘം പരിശോധിക്കും.
നേരത്തെ വിഎസ്എസ്.സിയിൽ നടത്തിയ പരിശോധനയുടെ അന്തിമഫലത്തിൽ സ്വർണ്ണത്തിന്റെ അളവ് സംബന്ധിച്ചും പാളികൾ മാറ്റിയോ എന്നതിലും പൂർണ്ണമായ വ്യക്തത വരാത്ത സാഹചര്യത്തിലാണ് ഈ നീക്കം. സ്വർണ്ണപ്പാളികളുടെ കൂടുതൽ സാമ്പിളുകൾ ശേഖരിച്ച് മുംബൈയിലെ ഭാഭ അറ്റോമിക് റിസർച്ച് സെന്ററിലെ അത്യാധുനിക ലാബിലേക്ക് അയക്കാനാണ് തീരുമാനം.
കുറ്റപത്രം സമർപ്പിക്കുന്നതിന് മുൻപ് ഇക്കാര്യത്തിൽ കൂടുതൽ ശാസ്ത്രീയമായ ഉറപ്പ് വരുത്താനാണ് അന്വേഷണ സംഘം ലക്ഷ്യമിടുന്നത്. ഈ വിവരം എസ് ഐ ടി ഇന്ന് ഹൈക്കോടതിയെ അറിയിക്കാനാണ് സാധ്യത.
